Ўзбекистон Суперлигаси 20-тури доирасида “Шўртан” — “Навбаҳор” ҳамда “Сўғдиёна” — “Динамо” учрашувлари бўлиб ўтди. Ғузорда кечган баҳс голларга бой тарзда ўтиб, жамоалар 3:3 ҳисобида дуранг натижани қайд этди. Жиззахдаги ўйинда эса 1:1 ҳисоби қайд этилди.
Ўзбекистон Суперлигаси
20-тур
“Шўртан” — “Навбаҳор” 3:3
Голлар: 1:0 — Нарзуллаев (3), 1:1 — Педро (22), 2:1 — Нарзуллаев (33), 2:2 — Педро (60), 2:3 — Ғуломов (79), 3:2 — Холдорхонов (90+6)
Ғузорда бўлиб ўтган баҳсда тезкор гол киритилди. Учрашувнинг 3-дақиқасида “Шўртан” футболчиси Дониёр Нарзуллаев рақиб дарвозасини ишғол этди. 22-дақиқага келиб, “Навбаҳор”нинг бразилиялик ҳужумчиси Педро ҳисобни тенглаштирди — 1:1. Орадан 10 дақиқа ўтиб, мезбонлар яна олдинга чиқди. Гол муаллифи яна Нарзуллаев бўлди. Шу тариқа, биринчи бўлим “Шўртан” фойдасига 2:1 ҳисобида якунланди.
Иккинчи бўлимнинг 60-дақиқасида Педро дублни расмийлаштириб, ҳисобни 2:2 кўринишига келтирди. 79-дақиқада Аббос Ғуломов меҳмонларни ҳисобда олдинга олиб чиқди — 2:3. Бироқ ўйин якунига яқин, Пўлатхўжа Холдорхоновнинг голи эвазига “Шўртан”га 1 очко тақдим этди — 3:3.
Мазкур дуранг натижасида “Навбаҳор” очколар сонини 32 тага етказиб, турнир жадвалининг 7-поғонасига кўтарилди. “Шўртан” эса 11 очко билан мусобақа жадвалининг сўнгги — 16-ўрнини эгаллаб турибди.
Ўзбекистон Суперлигаси
20-тур
“Сўғдиёна” — “Динамо” 1:1
Голлар: 0:1 — Маҳамаджонов (29), 1:1 — Дориев (90+6, пенальти)
Жиззахдаги “Марказий” стадионда бўлиб ўтган “Сўғдиёна” — “Динамо” учрашуви ҳам муросасиз ва қизиқарли кечди. Учрашув бошидан бошлаб ҳар икки жамоа навбатма-навбат ҳужум уюштирди.
Ҳисоб 29-дақиқада очилди — меҳмонлар ҳимоячиси Маҳмуджон Маҳамаджонов “Динамо” сафидаги дебют голини уриб, жамоасини олдинга олиб чиқди. У ёзги трансфер ойнасида “Пахтакор”дан Самарқанд клубига қўшилган эди. Шу тариқа биринчи бўлим “Динамо” фойдасига 0:1 ҳисобида якунланди.
Иккинчи таймда “Сўғдиёна” устунликни ўз қўлига олди. Жиззахликлар ҳисобни тенглаштириш мақсадида бир нечта хавфли ҳужумларни амалга оширди. Бироқ “Динамо” футболчилари ғалабани сақлаб қолиш учун қатъий ҳаракат қилди.
Беллашув тақдири сўнгги дақиқаларда ҳал бўлди. Ҳакам томонидан белгиланган 11 метрлик жарима зарбасини Люпчо Дориев аниқ амалга оширди ва 90+6-дақиқада ҳисобни 1:1 кўринишига келтирди. Шу тариқа, “Сўғдиёна” мағлубиятдан қутулиб қолди.
Ушбу натижадан кейин “Динамо” ҳисобидаги очколар сони 38 тага етди ва улар турнир жадвалининг 3-поғонасида қолди. “Сўғдиёна” эса 21 очко билан 11-ўринни банд этган.
Изоҳ (0)