Баъзида юзингиз шунчалик қизарадики, гўё ҳозиргина марафонда югуриб келгандек ҳис қиласиз. Аслида эса фақатгина қаҳва ичгансиз ёки бир оз асабийлашгансиз, холос. Бундай қизариш кутилмаганда юзага келади ва кайфиятни жиддий бузиши мумкин. Мақолада бундай ҳолатдан тезда чиқиб кетиш йўлларни ва қачон шифокорга мурожаат қилиш кераклигини билиб оласиз.
Нима сабабдан тери қизаради?
Аксарият ҳолларда бу терининг яллиғланиши ёки эпидермис юзасига қон оқимининг кучайиши натижасида юзага келади. Оқибатда тери пушти ёки қизил тус олади.
Қизариш қуёш нури, иссиқ ванна, аччиқ овқат, янги ниқоб ёки оддий стрессдан кейин ҳам пайдо бўлиши мумкин. Баъзида бу оддий организм реакцияси бўлса, бошқа ҳолларда бу жиддий муаммо белгиси бўлиши мумкин. Масалан: аллергия ёки сурункали касалликлар.
Агар юзингиз тобора тез-тез қизарадиган бўлса, бу ҳолатни эътиборсиз қолдирманг. Терингизни нима безовта қилаётганини эрта аниқласангиз, қизаришни йўқотиш анча осон бўлади.
Юз қизариб кетганда нима қилиш керак?
Биринчи қоидаси — ваҳимага тушманг ва ҳолатни янада ёмонлаштирадиган кескин ҳаракатлардан сақланинг. Терингизни ишқаламанг, иссиқ сув билан ювманг ва дарҳол макияж воситаларидан сурманг. Мақсад — қизаришни тўхтатиш ҳамда терига тикланишга ёрдам бериш. Бунинг учун бир неча самарали усул бор:
1. Совуқ компресс ва намлантириш
Энг оддий ва самарали чораларидан бири — совуқ компресс. Юмшоқ сочиқ ёки салфеткани совуқ сувга ботириб, юзингизга 10–15 дақиқага қўйинг. Бу қон томирларини торайтиради ва яллиғланишни камайтиради. Аммо муз қўймаслик керак, у аксинча, безовталикни кучайтириши мумкин.
Кейин терингизга тинчлантирувчи компонентларга эга юмшоқ намлантирувчи крем суртинг: ниацинамид, пантенол, сули экстракти, алоэ вера, яшил чой. Кислоталар, ретинол, спирт ва хушбўй моддалар сақловчи маҳсулотлардан воз кечинг. Бундай вақтда терингизга ортиқча юк эмас, ёрдам керак.
2. Тинчлантирувчи ниқоб
Агар терингиз ҳануз “ёнаётган” бўлса, тинчлантирувчи ниқоб қўлланг. Энг яхшиси — матоли ёки крем шаклидагилари бўлиб, улар терининг ҳимоя қатламини тиклайди ва яллиғланишни камайтиради. Фаол кислоталар, эфир мойлари ва парфюмерия қўшимчалари бўлган ниқоблардан сақланинг.
Шуни ҳам унутмангки, тери саломатлиги организмдаги суюқлик миқдорига бевосита боғлиқ. Кун давомида сув ичишни унутманг, қуёшда кўп бўлсангиз, иссиқ жойда ёки машқдан кейин кун давомида сув ичишни унутманг. Сувсизлик — терининг ташқи омилларга бўлган сезувчанлигини оширади.
3. Терига зарар етказувчи омиллардан воз кечиш
Янги парвариш воситаларини, айниқса фаол компонентли маҳсулотларни шифокор тавсиясисиз ишлатманг. Кўпинча қизариш айнан улардан келиб чиқади. Шунингдек, қуёшда узоқ юриш, иссиқ ванна, аччиқ овқат ва алкоголь — барчаси қизаришни кучайтиради.
4. Минимал бўяниш
Қалин тонал крем ва консилерлар айниқса қизариш эпизодидан кейин терингизни яна ҳам кўпроқ безовта қилиши мумкин. Бўянишда танаффус қилинг ёки енгил тонда ББ-кремдан фойдаланинг. У қизаришни нейтраллашга ёрдам беради, лекин терига юк бўлмайди.
Маҳсулот таркибида тинчлантирувчи компонентлар ва SPF бўлишига албатта эътибор беринг. Қуёш нурлари қизарган терининг асосий душманларидан биридир.
5. LED-терапия ва лазер муолажалари
Агар юздаги қизариш доимий муаммога айланган бўлса, дерматологлар аппарат усулларни кўриб чиқишни тавсия қилади. Энг самарали усуллардан бири — LED-терапия. Унда турли рангдаги ёруғликлар ёрдамида терига таъсир қилинади. Бу яллиғланишни камайтиради.
Агар қизариш кенгайган капиллярлар ёки розацея билан боғлиқ бўлса, лазер муолажаси керак бўлиши мумкин. У қон томирларини торайтиришга ва тери рангини нормаллаштиришга қаратилган. Бундай муолажалар фақат шифокор билан маслаҳатлашгандан сўнг бажарилиши керак.
Қачон дерматологга мурожаат қилиш керак?
Агар юзингиз тобора тез-тез ва кучлироқ қизараётган бўлса, бу ҳолат қичишиш, тошма, қуриш ёки ачишиш билан кечаётган бўлса, аллақачон дерматологга мурожаат қилиш вақти келганини англатади. Ҳатто оддий қизариш ҳам баъзида розацея, атопик дерматит, аллергия, экзема ёки бошқа тери касалликларининг илк белгиси бўлиши мумкин.
Дерматолог тўғри ташхис қўйиш билан бирга, жиддий сабабларга чек қўяди, даволаниш режасини белгилайди ва айнан сизнинг терингиз учун мос парвариш йўлини танлаб беради. Кўп ҳолларда тўғри ташхис нотўғри усуллар ва узоқ уринишларнинг олдини олади.
Юз терисининг қизариши бу шунчаки косметик муаммо эмас. Бу терининг “мен ноқулайликни бошдан кечиряпман” деган сигнали. Уни эътиборсиз қолдирманг, парваришингизни қайта кўриб чиқинг, зарур бўлса, шифокорга мурожаат қилинг.
Изоҳ (0)