Стресс юз терисига қандай таъсир кўрсатади?

Стрессга тушган одам жуда қайғули кўринади: маъюс, териси қуриган, қизарган, яллиғланиш ва қора доғлар оғир иш кунининг натижасидир. Шубҳасиз, стресс организмга бир қарашдаёқ кўзга ташланадиган белгилар билан таъсир қилади. Масалан, руҳий саломатликдан ташқари жиддий тери муаммоларига ҳам олиб келиши мумкин, деб ёзади Elle.

Терининг қуриши

Сурункали стресснинг оқибатларидан бири эпидермисдан ортиқча суюқлик йўқотилишидир. Терининг сувсизланиши ёғ безларининг бузилишига олиб келади: беморларнинг юзида ёғ, яллиғланиш ва оғриқли ҳис пайдо бўлади. Терини қайта жонлантириш учун липид тўсиғини тиклаш, липид синтези жараёнини бошлаш керак. Ҳимоя плёнкасини яратадиган табиий ёғлар, кислоталар (гиалурон), юмшатувчи (ёғлар) асосидаги маҳсулотлар билан терини парваришлаш лозим.

Терининг қизариши

Юздаги қон томир тармоғининг спазми ёки ортиқча бўшашиб кетиши сурункали стресснинг яна бир натижасидир. Теридаги қизариш кортизол — стресс гормони таъсири туфайли пайдо бўлади. Мунтазам стресс вақтида томирлар ингичка бўлиб, баъзан ҳатто ёрилиб кетади. Узоқ муддатдли стресс яллиғланишли тери касалликларининг ривожланишига олиб келиши мумкин. Ечим сифатида нозик тери учун капилляр-ҳимоя ва тинчлантирувчи хусусиятларга эга маҳсулотлар тавсия этилади. Мутахассиснинг фикрига кўра, бундай муаммоларнинг олдини олиш учун сариқ спектрли LED процедураларига эътибор қаратиш лозим: у терига 1,2 мм чуқурликка кириб, қон томирлари деворларини тинчлантиради ва мустаҳкамлайди.

Тери рангининг хиралашиши, қора доғлар ва шиш

Агар кортизол терини қизартириб юборса, адреналин, аксинча, капилляр спазмни келтириб чиқаради ва кислород алмашинувини бузади. Тери худди музлаб қолганга ўхшайди. Сурункали стресс натижасида юз ранги хира бўлиб қолиши ажабланарли эмас. Лимфа тизими ҳам стресс гормонларининг таъсири остида қолади. Функцияларининг бузилиши туфайли тўқималарда суюқлик сақланиб қолади, бунинг натижасида юзнинг шишиши ривожланиши ва кўз атрофидаги қора доиралар пайдо бўлиши мумкин.

Терининг эрта қариши

Стресс ҳатто юзнинг контурлари ва овалига ҳам салбий таъсир қилади: беморда мушакларнинг гипертонуслиги ёки қисқариши пайдо бўлиши мумкин. Гап шундаки, дам олиш пайтида мушак толалари овални сақлашга ёрдам беради. Гипертонус ҳолатида улар юзни пастга тортишни бошлайди. Стресс остида нафақат юзда, балки бутун организмда ажинлар пайдо бўлиш хавфи ортади.

Гипертонусни тузатиш ва олдини олиш ботулинум терапияси, юз ва бўйин ҳудудини массаж қилиш, шунингдек, умумий тана массажи ёрдамида амалга оширилади. Уйда мунтазам равишда юзни қўллар ёки массаж чўткаси билан уқалаш мумкин.