Нотўғри овқатланиш саломатлик ва терининг ҳолатига ёмон таъсир қилиши маълум, баъзи маҳсулотлар юз рангининг ўзгариши, қизариш ва шишни келтириб чиқаради. Аммо ҳар доим ҳам маҳсулотнинг ўзи эмас, балки ҳазм қилишни бузадиган нотўғри комбинация токсин, ёғ бирикмалари ва бошқа нохуш оқибатларнинг пайдо бўлишига олиб келади, деб ёзади “Новий очаг”
Сендвич билан қаҳва
Қаҳва ва колбаса ёки пишлоқли сендвич — бу кунни бошлашга одатланган шаҳар аҳолисининг стандарт нонуштасидир. Тадқиқотларга кўра, бу комбинация соғлом одамнинг қонида инсулиннинг кескин ўзгаришига олиб келиши мумкин. Ёғлар (пишлоқ, сариёғ, колбаса ва бошқалар) қондан шакарни чиқариб ташлаш жараёнини секинлаштиради ва ичимлик таркибидаги кофеин организмга фойдали моддаларнинг сўрилишига ўзига хос тўсиқ бўлиб хизмат қилади. Бундай нонуштанинг таъсири бир неча соат давом этади. Бундан ташқари, кофеин сувсизланишга олиб келиши маълум, тери эса сувсизланишдан ҳамиша азият чекади.
Помидор билан картошка
Помидорлар кислотали бўлиб, овқат ҳазм қилиш муаммолари ва шишга олиб келади. Агар помидор крахмалли углеводлар билан бир вақтда истеъмол қилинса, унда бундай овқатдан сўнг чарчоқ ва ҳолсизлик, юзда шиш пайдо бўлади, тери рангпар ва хира кўринишга келади.
Мева ва йогурт
Кўпчилик бу комбинацияни мазали ва фойдали деб ҳисоблашига қарамай, у умуман соғлом эмас. Ушбу комбинация овқат ҳазм қилишга ёмон таъсир қилади, ичак микрофлорасини ўзгартиради ва аллергик реакцияларни қўзғатиши мумкин. Меваларни бошқа маҳсулотлардан алоҳида истеъмол қилиш яхшироқ. Улар организм томонидан тез сўриладиган оддий шакарларни ўз ичига олади, аммо ёғлар мавжуд бўлган маҳсулотлар билан биргаликда улар ошқозонда узоқ вақт қолиши, оксидланиш ва ферментацияни бошлаши мумкин. Музқаймоқ билан меваларнинг комбинацияси ҳам шунга ўхшаш салбий оқибатларга олиб келади. Агар тери ҳақида гапирадиган бўлсак, унда ҳар қандай сут маҳсулотлари тери ёғи ва эндокрин безларнинг фаолроқ секрециясига ёрдам беради.
Балиқ ва тухум
Оқсилларни оқсиллар билан истеъмол қилиш тавсия этилмайди ва бу маҳсулотларнинг иккаласи ҳам оқсил синфига тегишли. Улар овқат ҳазм қилишни секинлаштиради, ичакларда ферментация ва чириш жараёнларини бошлайди. Бу, ўз навбатида, ич қотиши, токсинлар ва чиқиндиларнинг тўпланишига олиб келади, бу бир-икки кун ичида юз терисида салбий ўзгаришларни келтириб чиқаради.
Шўр билан ширин
Туз ва шакарни ортиқча истеъмол қилиш организмда суюқлик тўпланишига ва шиш пайдо бўлишига олиб келади. Баъзан пишлоқ ёки мураббо билан истеъмол қилинадиган егуликларни бунга мисол қилиш мумкин. Шунинг учун организмдан тузни чиқаришга ёрдам берадиган маҳсулотлар истеъмол қилиш ва бу орқали шишни бартараф этиш тавсия этилади.
Изоҳ (0)