Қозоғистонлик 22 ёшли Чингиз Алгазин тасодифан “вирусли” видео ёзиб олди ва жаҳон миқёсидаги моделга айланди. У ўз ҳикоясини Instagram ижтимоий тармоғида баҳам кўрди.
2024 йилда Чингиз автобусда ўзини видеога олаётганда тўсатдан кекса аёл унга ҳужум қилган: у “Мени суратга олишни бас қил” деб бақириб, уни сумкачаси билан ура бошлаган.
Йигит вазиятдан хафа бўлмай, автобусдаги видеони ижтимоий тармоқларга жойлаштирди. Тез орада видео тармоқларда кенг тарқалиб, мода оламидагиларнинг эътиборини тортди.
Йигит билан Қозоғистоннинг Мulan моделлар агентлиги боғланди, у ерда бепул таълим олди ва агентлик билан ҳамкорлик қила бошлади.
Бироқ бу ҳали ҳаммаси эмас. Яқинда Чингиз дунёдаги энг йирик моделлар агентликларидан бири бўлган IMG Models билан шартнома имзолади. Бу агентлик Белла ва Жижи Ҳадид, Тайра Бенкс, Ҳайди Клум, Саша Пивоварова ва Кейт Мосс каби подиум юлдузларини намойиш этади.
Йигит янги видеода ўз ҳикоясини сўзлаб берди:
“Мен ҳайратдаман. Ҳозир виза тайёрлаяпман ва сентябрь ойида мени Милан ёки Париж подиумларида кўришингиз мумкин бўлади”, деди Чингиз ва нима бўлишидан қатъи назар, ҳар бир инсонни ўзига ишонишга чақирди.
“Агар кимдир сизга сендан қанақа модел чиқади, деса, қулоқ солманг. Шунчаки ўзингизга ишонинг. Мен уддаладим, сиз ҳам уддалайсиз”, деб таъкидлади Чингиз.
Изоҳ (0)