Уйқу ва ёлғизлик, ижтимоий тармоқлар ва кўчмас мулк: Павел Дуров дунёда етарлича қадрланмайдиган ва ортиқча баҳо бериб юбориладиган нарсалар рўйхатини тузди

Telegram асосчиси Павел Дуров 10 октябрь куни 37 ёшни қарши олди. Ўша куни у дунёда етарлича қадрланмайдиган ва аксинча, ортиқча баҳо бериб юбориладиган нарсалар рўйхатини тузиб, Telegram каналида эълон қилди.

Дуровнинг сўзларига кўра, етарлича баҳоланмайдиган учта нарса — бу уйқу, табиат ва ёлғизлик. Дуровнинг таъкидлашича, уйқу «иммунитетни, ижодкорликни ва психологик фаровонликни оширади», ёлғиз қолиш эса инсонга «маънавий ва интеллектуал ютуқларга эришиш эркинлигини беради».

Telegram асосчиси табиатни «инсонлар биологик тарзда яратилган ва ўзини яхши ҳис қиладиган муҳит» деб таърифлади.

Дуровнинг ортиқча баҳолаб юбориладиган нарсалар рўйхати қуйидагиларни ўз ичига олади:

• катта шаҳарлар (Дуровнинг сўзларига кўра, улар ифлосланиш, жиноятчилик ва шовқин манбайи);
• ресторанлар (энг секин ва энг кам самарали овқатланиш усули);
• иссиқ об-ҳаво (хатти-ҳаракатларда ланжликка, одамларнинг тез қаришига олиб келади);
• мода (доимий ўзгариб турадиган тенденцияларни кузатиб бориш истаги қиммат ва кераксиздир);
• кўчмас мулк (кўчмас мулк сотиб олаётган одамларнинг кўчиб юриш эркинлиги чекланган бўлади);
• ижтимоий тармоқлар (ижтимоий тармоқлардаги «узлуксиз чиқиндилар оқими» ижодкорликни пасайтиради);
• таниқли кишиларнинг маслаҳатлари (соҳа мутахассиси бўлмаган одамларнинг фикрига эмас, балки аниқ фанга таяниш керак).