Ҳозирги кунда ҳар бир инсон ижтимоий тармоқлардан фойдаланади. Унда яқинларингиз билан истаганча суҳбатлашиш, расмлар ва видеолар юбориш мумкин. Бу ҳолатдан келиб чиқиб, дунёдаги барча инсонлар ижтимоий тармоқлардан фойдаланади, деб хулоса қилиш хато. Машҳур инсонлар орасида ижтимоий тармоқлардан фойдаланмайдиганлари ҳам бор. Масалан, Голливуд юлдузи Скарлетт Йоханссон ижтимоий тармоқлардан фойдаланмайди.
Актриса ижтимоий тармоқларга қарам бўлиб қолгани ҳақида сўзлаб берган. Скарлетт телефонни қўлига олганида, реал ҳаётни эсдан чиқариб қўяди. У ижтимоий тармоқлардаги контентни ва дўстларининг блогларини ўқишни яхши кўради, бироқ бу муаммо. Ижтимоий тармоқлар Йоханссонни ўзига қарам қилиб қўяди. Кейин актрисада ўзини айблаш туйғуси пайдо бўлади, чунки у вақтини беҳудага сарфлагандек ҳис қилади.
“Онамнинг телефонини қўлимга олганимда, уч ёшли болага ўхшаб қоламан. Шунинг учун ижтимоий тармоқлардан фойдалана олмайман”, — дейди актриса.
Актрисанинг мухлислари ўз кумирини кино оламидан ташқарида кўра олмаслигидан хавотирда. Улар ҳақиқатан ҳам Йоханссоннинг кунни қандай ўтказишини, нонуштага нима пиширишини ёки қандай образда бўлишини билишни хоҳлайди. Бироқ актриса етарлича машҳурликка эга ва у шахсий ҳаётини ортиқча эътибордан ҳимоя қилишга ҳаракат қилади.
“Инсонлар менинг шахсий ҳаётимга камроқ киришини афзал кўраман. Агар ҳаммаси шундай кетса, бахтли аёл бўламан. Актёр бўлишингиз ва фильмларда рол ўйнашингиз шахсий ҳаётингизга ҳаққингиз йўқ дегани эмас”, — дейди Скарлетт Йоханссон.
Актриса ўзининг жуда таъсирчан ва “эгоси жуда нозик” инсон эканини айтган. Ижтимоий тармоқлардаги ҳар қандай пост Йоханссонни хавотирга солиши мумкин. Ижтимоий тармоқларда салбий изоҳ ёзувчи инсонлар ҳам унга таъсир ўтказиши мумкин ва бундай ҳолатда ўзингизни улардан ҳимоя қилиш энг тўғри қарор.
Актриса ижтимоий тармоқларнинг ижобий томонларини ҳам инкор этмайди. Унинг фикрича, ижтимоий тармоқлар жамиятдаги инсонларни бирлаштириш, ижтимоий аҳамиятга эга маълумотларни узатиш ва глобал муаммоларни ҳал қилишнинг энг самарали воситаларидир. Бироқ актриса турли мода тенденциялари, мемлар ва шов-шувли янгиликлардан бохабар бўлмаётганидан хафа эмаслигини айтган.
“Мен кўп нарсаларни қўлдан бой бераётган бўлсам керак. Бироқ менда ҳеч қачон ижтимоий тармоқлар бўлмаган, шунинг учун ҳаммасини соғиндим деб айта олмайман”, — дейди актриса.
Изоҳ (0)