Шароф Рашидов тумани ҳокими Маҳмуд Холбўтаев 10 минг доллар пора олаётганда ДХХ ходимлари томонидан ушланди. Бу ҳақда Давлат хавфсизлик хизмати хабар берди.
Маълум қилинишича, Жиззах вилояти Шароф Рашидов тумани ҳокимлиги бош мутахассиси ўртада “даллол” вазифасини бажарган. У мактаб қуришга ажратилган 1,7 гектар ерни тадбиркорга кўп қаватли уйлар қурилиши учун ажратишга рухсат олиб беришини айтган. Эвазига 30 минг доллар талаб қилган.
Жорий йил 5 июль куни бош мутахассис сўралган пул маблағидан 10 минг долларини олиб, туман ҳокимига етказган. 8 июль куни эса тадбиркордан қолган 20 минг долларни ҳам ундирган. Кейин унга кўп қаватли уй қуриш учун ҳоким томонидан рухсат берилган ҳужжатларни тақдим этган.
Бош мутахассис ҳокимият биноси олдида туман раҳбари Маҳмуд Холбўтаев билан учрашиб, ҳокимга 10 минг доллар берган вақтида ДХХ ходимлари томонидан қўлга олинган.
“Ҳозирда Шароф Рашидов тумани ҳокими депутатлик дахлсизлик ҳуқуқидан маҳрум қилиниб, унга нисбатан Жиноят кодексининг 210-моддаси билан, бош мутахассисга эса Жиноят кодексининг 168 ва 211-моддалари билан жиноят иши қўзғатилди”, дея хабар берган ДХХ.
Шу билан бирга, Сирдарё вилоятида кузатилган бошқа бир коррупцион ҳаракат фош бўлгани хабар қилинган. Гулистон шаҳар прокурори ўринбосари ўз хизмат мавқеидан фойдаланиб, тадбиркордан пора талаб қилади. Воқеа Боёвут туманида қишлоқ хўжалиги соҳасида фаолият юритувчи МЧЖ раҳбари билан юз беради. Прокурор Боёвут тумани ИИБ Тергов гуруҳи иш юритувидаги Жиноят кодексининг 168 ва 167-моддалари билан қўзғатилган жиноят иши доирасида “қамоқ” эҳтиёт чораси қўлламаслик ҳамда кейинчалик ишни гумонланувчи фойдасига ҳал қилиб бериш эвазига 10 минг доллар пора сўрайди.
ДХХ ходимлари томонидан ўтказилган тезкор тадбирда қонун ҳимоячиси талаб қилинган пулни ўз хизмат хонасида олган вақтида ашёвий далиллар билан ушланган.
Прокурор ўринбосарига нисбатан Жиноят кодексининг 168 ва 28,211-моддаси билан жиноят иши қўзғатилган.
Хабарга кўра, юқоридаги ҳар икки ҳолат юзасидан мансабдор шахсларга нисбатан “қамоқ” эҳтиёт чораси қўлланилиб, тергов ҳаракатлари олиб борилмоқда.
Изоҳ (0)