Судланганлик ҳолатига қараб шахсни давлат фуқаролик хизматига ишга қабул қилиш ёки қилмаслик ҳал этилади. Бу ҳақда меҳнат ҳуқуқи бўйича мутахассис Саидали Мухторалиев “Дарё”га тушунтириш берди.
Қандай ҳолатларда ишга қабул қилиш мумкин эмас?
“Давлат фуқаролик хизмати тўғрисида”ги қонуннинг 28-моддасига кўра, оғир ва ўта оғир жиноятларни содир этганлик учун судланганлик ҳолати тугалланмаган ёки олиб ташланмаган шахсларни давлат фуқаролик хизматига ишга қабул қилиш мумкин эмаслиги белгиланган.
Оғир жиноятларга қасддан содир этиб, қонунда 5 йилдан ортиқ, лекин 10 йилдан кўп бўлмаган муддатга озодликдан марҳум қилиш жазоси назарда тутилган жиноятлар киради. Ўта оғир жиноятларга қасддан содир этилиб, қонунда 10 йилдан ортиқ муддатга озодликдан маҳрум қилиш ёхуд умрбод озодликдан маҳрум қилиш жазоси назарда тутилган жиноятлар киради (Жиноят кодексининг 15-моддаси).
Демак, қасддан оғир ва ўта оғир жиноятларни содир этган шахсларнинг судланганлик муддати тугалланмаган ёки олиб ташланмаган бўлса, уларни давлат фуқаролик хизматига ишга қабул қилиш мумкин эмас.
Судланганлик ҳолати тугалланганлиги
Жиноят кодекси бўйича 5 йилдан ортиқ, лекин 10 йилдан кўп бўлмаган муддатга озодликдан маҳрум қилиш жазоси назарда тутилган ва қасддан содир этилган жиноятни оғир жиноят деб оляпмиз, тўғрими? Жиноят кодексининг 78-моддаси "Э" бандига асосан бундай жиноятлар бўйича жазо ўтаб бўлинганидан кейин 7 йил ўтгач, судланганлик ҳолати тугалланган ҳисобланади. Ўта оғир жиноятлар бўйича эса, Жиноят кодексининг 78-моддаси "Ж" банди бўйича жазо ўталгач (10 йилдан ортиқ, 15 йилдан кўп бўлмаган озодликдан маҳрум қилиш жазоси ўталгач) 10 йилдан кейин судланганлик муддати тугаган ҳисобланади.
Судланганликни олиб ташланганлиги
Жиноят кодексининг 79-моддасига асосан алоҳида ҳолларда судланганлик муддатидан олдин ҳам олиб ташланиши мумкин. Судланганликни олиб ташлаш маҳкумнинг яшаш жойидаги жиноий ишлар бўйича судларнинг ажрими билан амалга оширилади. Демак, оғир ва ўта оғир жинояти учун судланганликни олиб ташлаш ҳақидаги суд ажримини тақдим этган шахсни давлат фуқаролик хизматига ишга қабул қилиш мумкин.
Коррупционэрлар
“Давлат фуқаролик хизмати тўғрисида”ги қонуннинг 28-моддасида ишга қабул қилиш мумкин бўлмаган шахслар қаторига коррупцияга оид жиноятларни содир этишда суд томонидан айбдор деб топилган шахслар ҳам киритилган.
Давлат хизматига қайтолмайди
ДХХ 7 июль куни уч ҳудудда ҳоким ўринбосари ҳамда агентлик ва инспекция ходимлари пора билан ушлангани ҳақида хабар берди. Унда айтилишича, Беруний тумани ҳокимининг ўринбосари, Агросаноат мажмуи устидан назорат қилиш инспекциясининг Андижон вилояти бошқармасида бўлим бошлиғи пора олган вақтида ушланган. Агар ушбу шахслар суд томонидан айбдор деб топилса, давлат фуқаролик хизматига қайтолмайди.
Изоҳ (0)