Агар қўшнилар баланд мусиқа қўйиб, дам олишингизга халақит қилса ёки тунда безовта қилувчи шовқинлар тинмаса, бу каби ҳолатларга нисбатан қатъий чоралар кўрилади. “Дарё” адвокат Дилфуза Саидовадан шу ҳолат бўйича изоҳ олди.
Ўзбекистонда “Аҳолини шовқиннинг зарарли таъсиридан ҳимоя қилиш тўғрисида”ги қонун лойиҳаси ишлаб чиқилгани ҳақида хабар берилган эди. Ушбу ҳужжатда фуқароларнинг осойишталиги ва нормал дам олишини бузувчи ҳаракатларга қарши кескин чора-тадбирлар, жарима миқдорлари ва вақт чегаралари аниқ кўрсатиб ўтилган. Унга кўра, нафақат тунги осойишталикни бузганлар, балки кундузи меъёридан ортиқ шовқин қилганлар ҳам жазога тортилиши мумкин.
Қачон шовқин қилиш мумкин эмас?
Қонунда шовқин келтириб чиқарадиган ҳаракатлар ва тақиқланган вақт оралиғи аниқ белгилаб берилган. Унга кўра:
иш кунлари тунги вақтда — 23:00 дан 06:00 гача;
дам олиш ва байрам кунлари — 22:00 дан 09:00 гача.
Бундай ҳаракатлар қаторига қуйидагилар киради:
- баланд овозда қўшиқ айтиш ёки мусиқа чалиш,
- телевизор ёки радиоприёмникни баланд овозда қўйиш,
- автомобиль сигналидан керакcиз фойдаланиш,
- зарурат бўлмаса таъмирлаш ишларини олиб бориш,
- ва бошқа шовқинли ишлар.
“Ўзбекистонда кундузги вақтда аҳоли яшаш ҳудудларида шовқин кўтарганлик учун жавобгарлик мавжуд” — адвокат Дилфуза Саидова.
— Ушбу ҳолат учун жавобгарлик белгиланган. Турар жойларда ва биноларда, аҳоли яшаш ҳудудларида ҳамда дам олиш зоналарида рухсат этилган шовқин даражасидан юқори шовқин кўтарсангиз, жавобгарлик мавжуд. Бу Ўзбекистон Республикаси Маъмурий жавобгарлик тўғрисидаги кодексда тартибга солинган. Бу ҳолат юзасидан базавий ҳисоблаш миқдорининг уч баравари миқдорида жаримага тортилишингиз мумкин.
Хўш, шовқин солувчи қўшнига қандай чора кўриш керак?
— Аввало оғзаки огоҳлантиринг — кўп ҳолларда тушунтириш етарли бўлади. Ёрдам бермаса, 102 рақамига мурожаат қилинг. Аризангизда вақт, жой ва шовқиннинг таъсирини кўрсатинг. Ҳолатни исботлаш учун аудио ёки видео ёзув ёзиб олиш зарар қилмайди. Агар йўқ бўлса, қўни-қўшни ва жамоат жойидан сўраб, аниқлаштирилади.
Жарима қанча?
- Фуқаролар учун — 3 дан 5 бараваргача БҲМ (яъни 1 020 000 сўмдан 1 700 000 сўмгача);
- Мансабдор шахслар учун — 10 дан 15 бараваргача БҲМ (яъни 3 400 000 сўмдан 5 100 000 сўмгача), дея тушунтириш берди адвокат.
Депутатларнинг таъкидлашича, бу қонун аҳолининг соғлиғи, руҳий осойишталиги ва қулай яшаш муҳити учун зарурий шарт-шароитларни яратиш ҳамда ҳар қандай зарарли шовқинга қарши самарали ҳуқуқий механизмларни жорий этиш имконини беради.
Изоҳ (0)