Тошкентда солиқ ҳуқуқбузарликлари ҳақида хабар бераётганлар «самосуд» қилинди (видео)

Ижтимоий тармоқларда бир неча шахслар томонидан бошқа фуқаролар «самосуд» қилинаётгани, ўзбошимчалик билан сўроққа тутилаётгани акс этган видеолар тарқалди. Тошкент шаҳар ИИББ ҳолатга муносабат билдирди.

Аниқланишича, ҳолатлардан бири Бектемир туманида содир бўлган. 18 март куни 19 ёшли А.Р. дўконларга харидор сифатида кириб, харид қилинган маҳсулот учун тўлов варақаси (чек)ни бермагани юзасидан ушбу дўконларнинг QR-кодини сканер қилиб, «Солиқ ҳамкор» саҳифасига юборгани учун дўкон эгалари П.С. (1990 йилда туғилган) ва К.Ф. (1991 йилда туғилган) томонидан турли сўзлар билан ҳақорат қилинган.

Бундан ташқари, 20 март куни Сергели туманида бир неча фуқаро 25 ёшли Л.Ф.ни дўкон ходимлари харид қилинган маҳсулот учун тўлов варақаси (чек)ни бермагани бўйича маълумотларни солиқ идораларига бераётганликда айблаган. Сўнг фуқаролар Д.Ғ., Х.А., У.Л., Н.Н., Х.С. ва бошқалар Л.Ф.ни турли сўзлар билан ҳақоратлаб, шовқин кўтариб, жамоат тартибини бузган.

Ҳозирда ушбу фуқароларга нисбатан Маъмурий жавобгарлик тўғрисидаги кодекснинг 41-модда (ҳақорат қилиш), 183-модда (майда безорилик), 200-модда (ўзбошимчалик)лари билан маъмурий баённома расмийлаштирилган.

«‘Солиқ ҳамкор’ дастурининг ишга туширилишидан мақсад истеъмолчиларнинг ҳуқуқларини ҳимоя қилишга, тадбиркорларнинг қонунга риоя этган ҳолда ишлашларини таъминлашга қаратилган. Агар тадбиркорлар уларга юборилган жаримадан норози бўлса, солиқ идораларига шикоят қилишлари мумкин, уларнинг мурожаати ўрганиб чиқилиб, қонуний қарор қабул қилиниши таъминланади», — дейилади муносабатда.

2022 йил 1 январдан солиқ ҳуқуқбузарликлари ҳақида «Солиқ» мобил иловасининг «Солиқ ҳамкор« бўлими орқали хабар берган фуқароларга ҳуқуқбузарлардан ундирилган жарима суммасининг 20 фоизи миқдорида мукофот тўланиши белгиланган.

Эслатиб ўтамиз, 2021 йилнинг октябрь ойида президентнинг назорат-касса техникасидан фойдаланишни такомиллаштиришга доир қарори қабул қилинганди. Ҳужжат билан 2022 йил 1 январдан бошлаб чакана савдо, умумий овқатланиш ва аҳолига маиший хизмат кўрсатиш объектларида харидни амалга оширган ҳамда ушбу харидни солиқ органларининг махсус мобил иловасида харид чекининг QR-коди ёрдамида сканерлаш орқали рўйхатдан ўтказган жисмоний шахсларга уларнинг банк карталарига ой якуни билан харид суммасининг 1 фоизи республика бюджетидан қайтарилади.