Термиз шаҳар маъмурий судининг очиқ суд мажлисида 2020 йилнинг июль ойида жабрланувчи — Сурхондарё вилояти ҳокими Тўра Боболовга туҳмат масаласида фуқаро Р.Г.га нисбатан ҳуқуқбузарлик иши кўриб чиқилган. Бу ҳақда адвокат Баҳодир Аҳмедов ўз Telegram-каналида хабар бермоқда.
Қарорда ёзилишича, фуқаро Р.Г. блогер қўнғироғига жавоб бера туриб, шу вақтда ҳамкасблари шовқин қилиб гаплашгани, шовқин сабабини сўраган блогерга ҳамкасблари вилоят ҳокими Тўра Боболов вафот этгани ҳақида гаплашишаётганини айтиб юборганини тан олган.
Ҳуқуқбузар Р.Г. ўзининг айбига иқрорлик билдириб берган кўрсатувидан ташқари, гувоҳлар Д.Ч., С.Х., С.Ж., Н.I. ва Н.М.ларнинг суриштирув давомида берган тушунтириш хатлари, Узун туман маъмурий судининг блогерга нисбатан қабул қилган қарори нусхаси, маъмурий баённома ва бошқа далиллар йиғиндиси билан тўлиқ ўз тасдиғини топган.
Фуқаро Р.Г. қилган ишидан чин кўнгилдан пушаймонлигини, етим эканлиги, онаси ва икки нафар синглисини якка ўзи боқиб келаётганини билдириб, суддан енгиллик беришни сўраган. Маъмурий жавобгарлик тўғрисидаги кодекснинг 33-моддасини (енгилроқ маъмурий жазо чорасининг қўлланиши) қўллаб энг кам жазодан ҳам камроқ жазо бериб, 669 минг сўм маъмурий жаримага тортилган.
Маълумот учун, Маъмурий жавобгарлик тўғрисидаги кодекснинг 40-моддаси — туҳмат, яъни била туриб ёлғон, бошқа бир шахсни шарманда қилувчи уйдирмаларни тарқатганлик учун базавий ҳисоблаш миқдорининг йигирма бараваридан (600 минг сўм) олтмиш бараваригача (1 миллион 800 минг сўм) миқдорда жарима солишга сабаб бўлади.
Эслатиб ўтамиз, август ойида ижтимоий тармоқларда Сурхондарё вилояти ҳокими Тўра Боболовнинг Ангор тумани прокурорини ҳақорат қилгани айтилган аудиоёзув тарқалганди. Сентябрь ойи бошида ҳам ҳоким Тўра Боболов Қизириқ туманининг собиқ ҳокими Илҳом Юсупов, тумандаги кластер вакили Х.Х.лар билан ўта қўпол муомалада бўлган аудиоёзув тарқалди. Ҳолат юзасидан вилоят ҳокимлиги берган изоҳда аудиодаги баъзи қисмлар бошқа овозлардан кесиб олиниб, монтаж қилингани айтилган.
Изоҳ (1)
"bazaviy hisoblash miqdorining yigirma baravaridan (600 ming so‘m) oltmish baravarigacha (1 million 800 ming so‘m)". Qachon bazaviy hisoblash miqdorining yigirma baravari 600 ming bo`laqoldi? 2 baravari 600 ming bo`ladi, 20 baravari 6 mln.