Фаолияти давомида “Манчестер Юнайтед”, “Реал Мадрид”, “Милан”, “Лос-Анжелес Гэлакси”, “ПСЖ” клублари ва Англия миллий терма жамоаси шарафини ҳимоя қилган Бекҳэм ўз исми атрофида бренд ярата олган футбол оламининг дастлабки вакилларидан бири ҳисобланади. Жарима зарбалари ижро этиш борасида футбол тарихидаги энг яхшилардан бири ҳисобланган Бекҳэм 2 май куни 48 ёшни қарши олди. Қуйида собиқ футболчининг фаолият йўли ҳақида сўз боради.
Девид мебел ишлаб чиқарувчи Тед Бекҳэм ва сартарош Сандра Уэст оиласида туғилган
Бекҳэмлар оиласи Лондон яқинидаги Лейтонстоун шаҳарчасида яшаган. Девид футбол билан шуғулланишни маҳаллий жамоаларда бошлаган. Дастлаб у отаси қўл остидаги “Рижуэй Роверс” жамоасида (Тед Бекҳэм клуб асосчиларидан бири эди), кейинроқ “Бримсдаун Роверс” ва “Тоттенҳэм”да машғулот ўтказган.
Девиднинг ота-онаси “Манчестер Юнайтед”га мухлислик қиларди ва мунтазам равишда “Олд Траффорд”га ташриф буюрарди. “Қизил иблислар”га бўлган муҳаббат ёш Бексга ҳам ўтди. Футболчи клубга 14 ёшида келиб қўшилган — “Манчестер Юнайтед” уни ўз академиясига қабул қилган. 1991 йилда Девид 16 ёшида манкунианлар билан ёшлар шартномасини имзолаган.
“Манчестер Юнайтед”даги дебют ва қатор совринлар
“Манчестер Юнайтед” ёшлар жамоаси билан 1992 йилда Англия кубогида ғалаба қозонди. Бекҳэм Ники Батт, Райан Гиггз, Гари Невилл, Фил Невилл ва Пол Скоулз каби афсонавий “92-синф”нинг бир қисми бўлган.
Худди шу 1992 йилда Девид Бекҳэм “Манчестер Юнайтед”нинг асосий жамоаси сафида Англия Лига Кубогида дебют қилди. Бир йил ўтиб “қизил иблислар” ярим ҳимоячи билан профессионал шартнома имзолаганди. Бекҳэм бир вақтнинг ўзида “Манчестер Юнайтед”нинг ёшлар жамоасида ўйнашни давом эттирди ва чемпионликни қўлга киритди, шунингдек, яна ёшлар ўртасидаги Англия Кубоги финалига чиқди.
Бекҳэм 1994 йилда Чемпионлар Лигасида дебют қилган. Ўзининг ЕЧЛдаги илк ўйинида “Галатасарой” дарвозасига гол урган, “Манчестер Юнайтед” йирик 4:0 ҳисобида ғалаба қозонганди. Шунга қарамай Бекҳэм “Юнайтед”да асосий таркибдан мунтазам жой олмаган. Шу сабабли клуб уни “Престон Норт Энд” жамоасига ижарага берган. Ижара омадли бўлди: Девид 5 та ўйинда 2 та гол урди, уларнинг биттаси бурчак зарбасидан тўғридан-тўғри киритилганди.
1995 йилда футболчи “Манчестер Юнайтед”га қайтган, АПЛда дебют қилган ва ниҳоят асосий таркибдан жой эгаллашни бошлаган. Бекҳэмни жамоага қўшиш учун “Манчестер Юнайтед” бош мураббийи Алекс Фергюсон ўзининг ўнг қанот ярим ҳимоячиси Андрей Канчельскисни сотиб юборади. Футболчи 1995/96 йилги мавсумда “қизил иблислар” таркибида 33 та ўйин ўтказган ва 8 та гол урган, шунингдек, Англия чемпионати ва Кубогида ғалаба қозонган. Яхши ўйинлари сабаб Англия терма жамоасидан чақирув олган ва 1996 йилнинг 1 сентябрида дебют қилган.
Бекҳэм “Манчестер Юнайтед”ни Фергюсон билан можаро сабаб тарк этган
Девид учун 1998/99 йилги мавсум фаолиятидаги энг яхшиси бўлди. “Манчестер Юнайтед” Англия чемпионатида ва Англия Кубогида, шунингдек, Европа Чемпионлар Лигаси финалида энг машҳур камбеклардан бирини амалга ошириб чемпион бўлганди. Бекҳэм финалда жамоаси томонидан киритилган иккала голга ҳам ассистентлик қилган.
Айнан ўша йилда футболчининг шахсий ҳаётида кўп воқеалар содир бўлган. Девид Spice Girls гуруҳи вокалисти Виктория Адамс билан турмуш қурди ва 1999 йилда ўғил фарзандли бўлди. Ҳозирда футболчининг 4 нафар фарзанди бор. Бекҳэм уйланганидан кейин ҳаёт тарзини ўзгартирди, қиммат автомобиллар сотиб олди ва тез-тез соч турмагини ўзгартириб турди. Бу ҳолат Алекс Фергюсонга ёқмади.
Девид яхши ўйин кўрсатганига қарамай, Фергюсон билан ўртадаги зиддият кескинлашиб борди. Улар ўртасидаги можаронинг энг юқори нуқтаси 2003 йилда Англия Кубоги доирасида “Арсенал”га қарши учрашувдаги мағлубиятдан кейин бўлди. Унда мураббий футболчининг юзига буци отганди.
“Менга унинг юлдузлик статуси ёқмаганди. Фақатгина у майдондан ташқарида ҳам шон-шуҳратга эришишни хоҳларди”, — деб эслаганди кейинроқ Алекс Фергюсон.
Ушбу воқеадан сўнг Фергюсон “Манчестер Юнайтед” раҳбариятига Бекҳэмни сотиш илтимоси билан мурожаат қилди. Кейинги йилнинг ёзида Девид 37 миллион евро эвазига “Реал”га ўтганди.
Бекҳэм “Реал”да “Галлактикос” аъзосига айланди, лекин фақатгина 2 та соврин қўлга киритди
Девид Бекҳэм “Реал Мадрид”га жамоанинг энг яхши пайтида ўтгандек кўринганди. Бу вақтда Мадрид клубида Луиш Фигу, Зинедин Зидан ва Роналдо каби юлдузлар ўйнарди. Бекҳэм “Реал”га барча футбол юлдузларини йиғмоқчи бўлган Флорентино Перес лойиҳасининг бир қисми эди. “Қаймоқранглилар”нинг бу таркиби кейинчалик “галактикос” деб аталган.
Бироқ майдондаги ишлар унчалик силлиқ кечмади. Девид Мадрид клубида ўйнаган вақтда жамоа 7 та мураббий алмаштирди, аммо бу натижа келтирмади. Бекҳам ва “Реал”нинг юлдузли таркиби фақатгина бир марта Испания чемпионатида ғалаба қозонди ва Испания Суперкубогини ютди. Жамоа бу даврда бирор марта ҳам Чемпионлар Лигаси финалига етиб бора олмади.
Бекҳэм “Реал” билан ягона чемпионлигини жамоадаги сўнгги мавсумида қўлга киритган. Мухлислар англиялик футболчи билан шартномани узайтиришни хоҳлади, чунки Девид мавсумни яхши якунлаганди. Лекин клуб буни истамади. “Қаймоқранглилар” англиялик футболчи билан келиша олмади ва у АҚШ клубига кўчиб ўтишга қарор қилди.
Бекҳэм АҚШда футболга бўлган қизиқишни оширди ва MLS’ни ўзгартирди
Футболчининг “Лос-Анжелес Гэлакси”га ўтиши катта шовқин келтириб чиқарди. ОАВда Бекҳэм учун кучли реклама кампанияси бошланди, лига эса ўз қоидаларини ўзгартирди. Энди MLS’нинг барча клубларига маош чегарасидан ташқарида бўлган икки футболчини олиб келишига рухсат берилди. Янги қоида Бекҳэм номини олди.
Бекҳэмнинг “Гелакси” футболчиси сифатидаги таништирув маросимига 5 минг мухлис ва 700 журналист келди. Футболчи “Челси”га қарши ўртоқлик учрашувида дебют қилди. Девид ўйиннинг катта қисмини захирада ўтказди, 78-дақиқада майдонга тушди ва дарҳол жароҳат олди.
Англиялик футболчининг “Гелакси” таркибидаги биринчи мавсумлари қийин ўтди. У тез-тез жароҳат олди ва кам гол урди. Кейин эса ўйинчи қанчадир вақтни Европада ўтказишга қарор қилди. Икки марта ижара асосида “Милан”га ўтди ва Роналдиньо, Пирло каби футболчилар билан бирга ўйнади. “Гелакси” мухлислари Бекҳэмни ёқтирмай қолди ва унга қарши ғазабли сўзлар ёзилган баннерлар кўтаришни бошлади.
Иккинчи марта ижарадан қайтганидан кейин футболчи ниҳоят “Гелакси” учун ўйнашни бошлади. Бекс чемпионатда 15 та, плей-оффда 3 та голли узатмани амалга оширди ва унинг жамоаси MLS чемпионига айланди. Мухлислар муҳаббати қайтди, бу эса Бекҳэмни яна бир мавсум АҚШда қолишига сабаб бўлди.
2012 йилда “Гелакси” яна MLS чемпионлигини қўлга киритди ва Девид Америкадаги футболчилик фаолиятини якунлади. Бекҳэм аллақачон 37 ёшга тўлган бўлса ҳам Европа клубларидан таклифлар олди.
Девид Бекҳэм фаолиятидаги сўнгги клуб “ПСЖ” бўлди
Футболчи 2013 йилда 5 ойлик шартнома имзолади ва унинг барча маошини болалар хайрия ташкилотига ўтказди. Англиялик футболчи “ПСЖ” сафида кўп ўйин (14 та) ўтказмаган бўлса ҳам Франция чемпиони бўлди. 2013 йилнинг 16 май санасида Девид Бекҳэм фаолиятини якунлашини эълон қилди.
“Жамоадошларим, менга кўп нарсани ўргатган мураббийларим ва мени қўллаб-қувватлаган мухлислардан миннатдорман”, — деганди англиялик футболчи.
Бекҳэм Англия терма жамоасида 13 йил ўйнади, бироқ бирорта ҳам соврин юта олмади
Футболчи учун терма жамоа сафидаги биринчи катта турнир 1998 йилги Жаҳон Чемпионати бўлди. Девид гуруҳдаги сўнгги ўйинда жарима зарбасидан гол уриб, Англиянинг кейинги босқичга чиқишига ёрдам берди. Аргентинага қарши 1/8 финал ўйинида эса Майкл Оуэннинг голига пас берди. Лекин Бекҳэмнинг ўзи ҳаммасини бузди. Ярим ҳимоячи 47-дақиқада Диего Симеонега ишлатган қўполлиги учун қизил карточка олиб майдондан четлатилди. Учрашув дуранг билан якунланди ва пенальтилар сериясида Аргентинанинг қўли баланд келди.
Бекҳэм 2 та Европа чемпионати ва 3 та Жаҳон Чемпионатида иштирок этган. Лекин бу вақтда Англия терма жамоаси бирор марта ҳам чорак финалдан ўта олмаган. Девиднинг ҳисобида терма жамоада 115 та ўйин ва 17 та гол бор.
Изоҳ (0)