Ички ишлар вазирлигида автотранспорт воситаларидан чиқадиган кучли овоз (шовқин)ни ўлчайдиган мослама мавжуд эмас. Бу ҳақда 31 октябрь куни ИИВ Йўл ҳаракати хавфсизлиги бош бошқармаси (ЙҲХББ) мутасаддилари билан бўлиб ўтган очиқ мулоқотда маълум қилинди, дея хабар бермоқда «Дарё» мухбири Мусулмонбек Иброҳимов.
ИИВ ЙҲХББ бошлиғи ўринбосари полковник Эрали Бозоровнинг айтишича, автотранспорт воситаларидан чиқадиган шовқин — жуда долзарб масала ва бу борада Экология ва атроф муҳитни муҳофаза қилиш давлат қўмитаси билан ҳамкорликда бир йилда икки бор «Тоза ҳаво» тадбири ўтказилади.
Очиғини айтиш керак, бизда автомашиналардан чиқаётган овозни ўлчаш мосламаси мавжуд эмас. Экология қўмитасида ҳам бундай ускуна йўқлиги маълум бўлди. Ваҳоланки, шовқин даражаси белгиланган меъёрдан ортиқ бўлган, мотори «гуриллаб» турадиган машиналардан фойдаланиш тақиқланган.Маълумот учун, Маъмурий жавобгарлик тўғрисидаги кодекснинг 127-моддаси учинчи қисмига кўра, тегишли рухсат олмай туриб транспорт воситаларига товуш чиқарувчи қурилмаларни ўрнатиш ана шу қурилмаларни мусодара қилиб, фуқароларга энг кам иш ҳақининг бир баравари (223 минг сўм)дан уч баравари (669 минг сўм)гача, мансабдор шахсларга эса — энг кам иш ҳақининг уч баравари (669 минг сўм)дан беш баравари (1,11 миллион сўм)гача миқдорда жарима солишга сабаб бўлади.Муаммо шуки, овозни ўлчаш мосламаси бўлмаганидан кейин, шовқиннинг даражаси қанчалик эканлигини билмаганимиздан кейин, бу борада қоида бузаётган ҳайдовчиларга ҳам бирор чора кўролмаймиз. Бу камчиликни бартараф этиш бўйича Экология қўмитаси билан биргаликда қўшма қарор тасдиқланган.
Эрали Бозоров, ИИВ ЙҲХББ бошлиғи ўринбосари, полковник
Изоҳ (0)