Ўзбекистонда тиббиёт ходими фаолиятига аралашганлик учун жавобгарлик белгиланмоқда

Бош прокуратура «Ўзбекистон Республикасининг айрим қонун ҳужжатларига ўзгартиш ва қўшимчалар киритиш тўғрисида»ги қонун лойиҳасини муҳокамага қўйди.

Қонун лойиҳаси билан Маъмурий жавобгарлик тўғрисидаги кодекс тиббиёт ходими фаолиятига қонунга хилоф равишда аралашганлик, яъни тиббиёт ходими тиббий ёрдам ёки тиббий хизмат кўрсатишига тўсқинлик қилганлик, шунингдек, тиббиёт ходими тиббий ёрдам ёки тиббий хизмат кўрсатишига тўсқинлик қилиш мақсадида унга ноқонуний топшириқлар берганлик учун жавобгарликни назарда тутувчи янги 197-7-модда билан тўлдирилмоқда.

Бу фуқароларга базавий ҳисоблаш миқдорининг беш бараваридан етти бараваригача (2,1 миллион сўмгача), мансабдор шахсларга эса — етти бараваридан ўн бараваригача (3 миллион сўмгача) миқдорда жарима солишга ёки ўн беш суткагача муддатга маъмурий қамоққа олишга сабаб бўлади.

Шунингдек, Жиноят кодекси 277-моддаси учинчи қисми «г» бандига ўзгартириш киритилиб, безорилик жинояти ўз хизмат ёки фуқаролик бурчини бажариши муносабати билан шахсга ёки унинг яқин қариндошларига нисбатан содир этилиши уч йилдан беш йилгача озодликдан маҳрум қилиш жазоси тайинланишига олиб келиши кўрсатилиб, бунинг натижасида тиббиёт ходимларига безорилик оқибатида тажовуз қилганлик учун жавобгарлик оғирлаштирилмоқда.

Аввалроқ 1 июндан тиббиёт ходимларининг иш ҳақи икки марта оширилиши, Ўзбекистондаги барча тиббиёт ходимлари дастлабки ва даврий тиббий кўрикдан бепул ўтказилиши, мамлакатда тиббиёт ходимларига 100 фоизгача махсус ойлик устамалар тўланиши тўғрисида хабар берилганди.