Марҳамат тумани Маъмурий суди судьяси Акмал Алижоновнинг «Дарё»га маълум қилишича, фуқаро Ж.Т. 2020 йилнинг 21 апрель куни жамиятда юриш-туриш қоидаларини бузиб, қайнанаси Ш.С.нинг хонадонига бориб, ўзаро келишмовчилик сабаб бирга яшамаётган турмуш ўртоғи Ш.Т.ни мажбуран олиб кетишга ҳаракат қилган.
Турмуш ўртоғи у билан кетишдан бош тортгач, уни ва қайнанасини ҳақорат қилиб, қайнанасининг дарвозасини тепиб, шовқин-сурон кўтарган. Шунингдек, пичоқ ва бензин олиб келиб, маҳалладошлари олдида турмуш ўртоғи ва қайнанасини ўлдиришини айтиб, қайнанасига тегишли уйни ёқиб юбориш билан қўрқитган.
Суд фуқаро Ж.Т. ишини кўриб чиқиб, уни Маъмурий жавобгарлик тўғрисидаги кодекснинг 41-моддаси (Ҳақорат қилиш) ҳамда 183-моддаси (Майда безорилик) билан айблаб, 15 сутка қамоқ ҳамда 4 миллион 460 минг сўм жарима тайинлаган.
Изоҳ (0)