Бухоро вилоятининг Шофиркон туманида ЙПХ инспекторларининг қонуний талабига бўйсунмай, инспекторни ҳақорат қилган эр-хотиннинг бири қамалди, бири жарима тўлайдиган бўлди. Бу ҳақда «Дарё»га Бухоро вилоят ИИБ ахборот хизмати раҳбари Қувват Ярашов маълум қилди.

Маълум қилинишича, жорий йилнинг 20 май куни шофирконлик 30 ёшли фуқаро Ф.М. туман ИИБ Йўл ҳаракати хавфсизлиги гуруҳи инспектори Муҳаммад Хўжаевга қўнғироқ қилиб, Howo русумли юк машинасининг орқа томонидан бораётган вақтида унинг бортидан тушган тошлар бошқарувидаги Ravon’га зарар етказганини, воқеа жойига зудлик билан етиб келиб, юк автомашинаси ҳайдовчисига нисбатан қонуний чора кўришни сўраган.

Фуқаро хабари асосида Шофиркон туман ИИБ ЙҲХХ ходимлари воқеа жойига етиб борган.

Ўрганиш давомида Howo русумли юк автомашинаси ҳужжатлари ҳамда борти кўздан кечирилиб, ҳайдовчининг барча тегишли ҳужжатлари мавжудлиги ва автомашина юкхонаси талабга тўлиқ жавоб бериши, Ф.М. бошқарувидаги автомашинага зарар етказилмагани аниқланган.

«Нотўғри хабар етказган фуқаронинг ўзида ҳайдовчилик гувоҳномаси йўқлиги, бу ҳам етмагандек, унга автомашинани бошқариш учун берилган вақтинчалик рухсатноманинг муддати тугаганлиги маълум бўлди», — дейди катта сержант Муҳаммад Хўжаев.

Воқеалар ривожи бошқача тус олишини кутмаган эр-хотин Йўл ҳаракати хавфсизлиги хизмати ходимларига эътироз билдирган. Уларни тамагирликда айблаб, турли ножўя сўзлар билан ҳақорат қилган. Фуқаро О.Р. шовқин кўтариб, катта сержант Муҳаммад Хўжаевнинг эгнидаги хизмат кийимини тортқилаб, ўнг қўлининг юқори қисмига жароҳат етказган.

Мазкур ҳолат бўйича тўпланган ҳужжатлар 2020 йил 11 июнь куни Шофиркон туман Маъмурий суди томонидан кўриб чиқилган.

Эр-хотин Маъмурий жавобгарлик тўғрисидаги кодекснинг 183-моддаси (Майда безорилик), 194-моддаси 1-қисми (Ички ишлар органи ходимларининг қонуний талабларини бажармаслик) ҳамда 200-моддаси (Ўзбошимчалик)да айбланиб, фуқаро Ф.М.га 15 сутка маъмурий қамоқ, турмуш ўртоғи О.Р.га эса базавий ҳисоблаш миқдорининг уч баравари миқдорида жарима жазоси тайинланган.