Нақд хорижий валюталарни ноқонуний олиб чиқишга бўлган уринишга чек қўйилди, деб хабар берди Андижон вилояти божхона бошқармаси.
Маълум қилинишича, “Дўстлик” чегара божхона постига чиқиш пиёда йўлаги орқали Қирғизистонга ўтиб кетиш мақсадида кириб келган фуқаро К.Ш. белгиланган тартибда шахсий кўрикдан ўтказилди.
Натижада ушбу шахснинг ёнидан йўловчи божхона декларациясида кўрсатилмаган ва оғзаки сўровда маълум қилинмаган 12,7 минг доллар борлиги аниқланди.
Ҳолат юзасидан божхона органлари томонидан терговга қадар текширув ҳаракатлари давом эттирилмоқда.
Маълумот учун, фуқаро ўзига тегишли бўлмаган валюта маблағларини божхона чегараси орқали олиб чиқаётган ёки олиб кираётган ҳолларда, валюта маблағларини эгаси тўғрисидаги маълумотлар билан йўловчи божхона декларацияси иловасини тўлдирган ҳолда, божхона ходимига тақдим этиш йўли билан божхона назоратидан ўтказилиши белгиланган.
Божхоначилар йил бошидан буён салкам 40 кг заргарлик буюмларининг ноқонуний олиб ўтилишига чек қўйди.
Жумладан, “Тошкент-Аэро” ихтисослаштирилган божхона комплексининг Тошкент халқаро аэропорти чегара божхона постида заргарлик буюмларини қонунга хилоф тарзда олиб киришга бўлган қатор уринишлар фош қилинди.
Рақамларга кўра, республика божхоначилари томонидан 2025 йилнинг ўтган даври мобайнида аниқланган 252 та божхона қонун бузилиши ҳолатларида қиймати 24,3 млрд сўмлик салкам 40 кг оғирликдаги заргарлик буюмларининг божхона чегаралари олиб ноқонуний равишда олиб ўтилиши ва ички ҳудуддаги яширин айланмасига чек қўйилган.
Изоҳ (0)