Андижонда Қирғизистонга олиб чиқиб кетилаётган хорижий валюталар ушлаб қолинди

Андижонда валютани ноқонуний равишда хорижга олиб чиқиб кетишга уринган шахс тўхтатиб қолинди, деб хабар беради вилоят Божхона бошқармаси.

Маълум қилинишича, Андижон вилояти божхона бошқармаси «Дўстлик» чегара божхона пости чиқиш-авто йўлаги орқали Қирғизистонга ўтиб кетиш мақсадида кириб келган фуқаро М.У. бошқарувидаги Hyundai Solaris русумли автотранспорт воситаси божхона кўригидан ўтказилган.

Натижада автотранспорт воситасининг йўловчи ўриндиғи орқасидаги чўнтагидан декларацияда кўрсатилмаган ва божхоначиларнинг оғзаки сўровида маълум қилинмаган олиб чиқиш меъёридаги нақд хорижий валютадан ортиқча бўлган 17 минг АҚШ доллари мавжуд экани аниқланган.

Мазкур ҳолат юзасидан терговга қадар текширув ҳаракатлари давом эттирилмоқда.

Маълумот учун, қонунчиликка кўра 100 миллион сўмгача эквивалентдаги нақд хорижий валютани Ўзбекистон ҳеч қандай рухсатномасиз олиб чиқиш мумкин. Шунингдек, 70 миллион сўмгача бўлган эквивалентдаги маблағ учун декларация талаб қилинмайди.

Аввалроқ Тошкент халқаро аэропортида 286 минг доллардан ортиқ пулни норин, кабоб, пахлава каби егуликлар орасига яшириб, божхонадан олиб ўтилишининг олди олингани ҳақида хабар берилган эди.