Ўзбекистон Яқин Шарқ ва Жанубий Осиёдаги электротехника маҳсулотлари экспортини оширишга интилмоқда

Ўзбекистон ҳукумати Яқин Шарқ ва Жанубий Осиё минтақаларига электротехника маҳсулотлари экспортини оширишга интилмоқда. Бу ҳақда Ўзбекистоннинг Қатардаги элчихонаси иқтисодиёт бўйича маслаҳатчиси Маҳмуд Маҳмудов Qatar Tribune нашрига берган интервьюсида маълум қилди

Маҳмудовга кўра, Ўзбекистон расмийлари ўз олдига электротехника маҳсулотлари экспортини анъанавий бозорлар, жумладан, Яқин Шарқ, Жанубий Осиё ва Европа бозорларидан ташқари янги бозорларга ҳам жорий қилиш мақсадларини қўйган. Бу борада эса Ўзбекистонга берилган GSP+ имтиёзли савдо режимини ниҳоятда катта ёрдам беради.

Ўзбекистон вакили Qatar Tribune нашрига берган интервьюсида 2023 йил сентябрь ойида қабул қилинган “Ўзбекистон – 2030” стратегияси Янги Ўзбекистонни ривожлантириш стратегиясида белгиланган барча мақсадларнинг бажарилишини таъминлашини таъкидлаган. Бу йўлда мамлакат ўз тамойилларига содиқ қолиши, дўстлик ва савдо муносабатларини барқарор ривожлантириши айтилган.

Манбада айтилишича, Ўзбекистон президенти сўнгги етти йил давомида электротехника саноати корхоналарига божхона ва солиқ имтиёзлари, транспорт ва бошқа харажатларни қоплаш учун субсидиялар беришни назарда тутувчи бир қанча қонун ҳужжатлари қабул қилган. Бу эса амалий аҳамиятга эга бўлиб, тармоқнинг гуркираб ўсиши учун катта шарт-шароитлар ҳозирлаган.

Маҳмудов берган маълумотга кўра, Ўзбекистонда мингга яқин электротехника саноати ишлаб чиқариш корхонаси фаолият юритмоқда. Уларнинг аксарияти кичик корхоналар бўлиб, 2 минг турдан ортиқ маҳсулот ишлаб чиқармоқда. Саноатдаги деярли барча корхоналар хусусий мулк бўлиб, соҳада банд бўлганларнинг умумий сони 35 минг кишидан ошади.

76 та йирик ишлаб чиқариш субъектининг 18 таси электр симлари ва кабеллари, 27 таси маиший техника, 32 таси қувват трансформаторлари ва бошқа электротехника маҳсулотлари ишлаб чиқармоқда. Ҳар йили янги ишлаб чиқариш қувватлари ўрнатилмоқда.

Хабарда айтилишича, 2022—2026 йилларда Янги Ўзбекистонни ривожлантириш стратегиясида 2026 йилга бориб саноат ишлаб чиқаришини 1,4 баробар, жумладан, электротехника саноатида юқори қўшимча қийматга эга маҳсулотлар ишлаб чиқаришни 2 баробар, экспорт ҳажмини эса 3 баробар ошириш кўзда тутади.

Сўнгги етти йилда соҳага жалб қилинган инвестициялар ҳажми 935 миллион долларни ташкил этган. Шундан 400 миллион долларга яқини тўғридан тўғри хорижий инвестициялар ҳисобланади.

Бундан ташқари, умумий қиймати 800 миллион доллардан ортиқ бўлган 260 дан ортиқ янги инвестиция лойиҳалари, жумладан, 120 миллион долларга баҳоланган 50 та кабел ишлаб чиқариш соҳаси бўйича лойиҳалар, 380 миллион долларлик 115 та маиший техника ишлаб чиқариш лойиҳалари, 60 миллион доллар қийматдаги 40 та энергетика лойиҳаси ҳамда 250 миллион долларлик 58 та бошқа муҳандислик лойиҳалари ишга туширилди”,  деган Қатардаги Ўзбекистон расмийси.

Ўзбекистон элчихонасининг иқтисодиёт бўйича маслаҳатчиси 2017-2023 йилларда электротехника саноатида ишлаб чиқариш ҳажми 7,1 бараварга ошиб, 1,98 миллиард долларга етганини, жумладан, симлар, кабеллар ва мис маҳсулотлари ишлаб чиқариш 5,5 баробарга ошиб, 792 миллион долларга етганини маълум қилган; маиший техника соҳаси 8,2 бараварга ошиб, 633 миллион долларгача, техник жиҳозларга хизмат кўрсатиш эса 9,3 баробарга ошиб, 567 миллион доллар қўшимча даромад келтирган.

Таъкидлаш жоизки, маиший техника экспортининг сезиларли ўсиши (10 баравардан ортиқ) Artel Electronics компанияси томонидан Ўзбекистонда янги ишлаб чиқариш қувватларини яратиш ҳисобига содир бўлди. Хусусан, музлатгичлар экспорти ҳажми 15 баравар ошиб, 58 миллион долларга, телевизорлар 6 баробарга ошиб 52 миллион долларга, электр плиталар савдоси 4,5 баробарга ошиб 40 миллион долларга, кир ювиш машиналари 5 баробарга ошиб 20 миллион долларга, кондиционерлар экспорти эса 4 баробарга кўпайиб, 15 миллион долларга етди,  деган Ўзбекистоннинг Қатардаги расмийси.