Андижонда COVID-19 таҳлили натижаларини қалбакилаштириб сотаётган гуруҳ қўлга олинди

Андижонда ДХХ вилоят бошқармаси ҳамда Бош прокуратура ҳузуридаги иқтисодий жиноятларга қарши курашиш департаменти ходимлари COVID-19 инфекцияси натижаларини қалбакилаштириб сотаётган уюшган гуруҳни қўлга олди. Бу ҳақда «Дарё» мухбири Умиджон Мамарасулов хабар берди.

Маълум қилинишича, «Дўстлик-авто» чегара божхона пости орқали бир суткада Қирғизистонга ўтиб қайтаётган беш мингга яқин йўловчилардан коронавирусга тест топширгани ҳақидаги натижалар талаб қилинмоқда. Ушбу маълумотномани олиш учун 190 минг сўм тўланиб, тест топширилади ва натижа олти соатда чиқади. Ўтиб қайтувчиларда шу маълумотномага эҳтиёж борлигини билган жиноий гуруҳ эса COVID-19 инфекциясининг ижобий натижасини 150 минг сўмдан сотишни йўлга қўйган.

Аниқланишича, қалбакилаштирилган маълумотномалар Андижон ва Фарғона вилоятлари, Қўрғонтепа тумани санитария-эпидемиология осойишталик марказлари, «Shedevr Denta Med» хусусий диагностика маркази, «Фарм стандарт люкс» МЧЖ, Андижон даволаш диагностика маркази бланкаларига чоп этилган ва муҳри урилган ҳолда сотилган.

Наманган вилоятининг Норин туманида яшовчи А.С., Андижон шаҳрида яшовчи С.К., Андижон туманида яшовчи О.Б. ва бошқа шахслар юқоридаги тиббиёт муассасаларининг бланкаларини 75 минг сўмдан сотиб олиб, мижозга оид маълумотларни қўлда ёзган ҳолда 150 минг сўмдан сотиб келган.

Ушбу ҳолат COVID-19 инфекцияси билан боғлиқ эпидемиологик вазиятнинг кескинлашувига сабаб бўлиши инобатга олиниб, ДХХ вилоят бошқармаси ҳамда Бош прокуратура ҳузуридаги иқтисодий жиноятларга қарши курашиш департаментининг Хўжаобод туман бўлими ходимлари томонидан тадбир ўтказилган.

Тадбир натижаларига кўра, Қўрғонтепа туманида яшовчи Б.А. тўртта қалбакилаштирилган тест натижалари тўғрисидаги маълумотномаларни 800 минг сўм эвазига сотаётган вақтида қўлга олинган. Шунингдек, Б.А.нинг оғзаки аризаси ва кўрсатмалари асосида тадбир давом эттирилиб, Қўрғонтепа туманида яшовчи Р.Р. қалбакилаштирилган тўртта маълумотноманинг ҳар бирини 150 минг сўмдан сотаётган вақтида ушланган. Суриштирувлар давомида Р.Р. Қўрғонтепа тумани давлат санитария-эпидемиология осойишталиги маркази муҳри туширилган маълумотномаларни ушбу марказнинг Дилафруз исмли ходими орқали ҳар бирини 70 минг сўмдан сотиб олган.

2020 йилнинг 6 ноябрь куни Қўрғонтепа ДСЭОМ санитария-гигиена хизмати лаборанти Д.С. аввал сотган маълумотномалари учун 500 минг сўм пул ва тўртта муҳрланган маълумотнома учун 200 минг сўм, жами кимёвий ишлов берилган 700 минг сўм пулни олаётган пайтида ушланган.

Д.С. ҳам маълумотномаларни ДСЭОМ котибаси Г.У.дан ҳар бири учун 30 минг сўмдан бериб, сотиб олаётганини маълум қилгач тадбир давом эттирилиб, Г.У. марказга яқин ҳудудда Д.С.дан аввал олган маълумотномалари учун 500 минг сўмни олаётган вақтида қўлга олинган.

Мазкур ҳолат юзасидан ҳозирда департаментнинг Хўжаобод туман бўлими томонидан дастлабки суриштирув тадбирлари олиб борилмоқда.