Жиззах вилояти божхона бошқармаси Контрабандага қарши курашиш ва божхона аудити бўлими ходимлари Ўзбекистонга олиб кирилган телевизорларнинг қонунга хилоф реализациясини олдини олиш ва фош этиш юзасидан тезкор тадбир ўтказди. Бу ҳақда Давлат божхона қўмитаси матбуот хизмати хабар берди.
Тадбир давомида фуқаро Д.Ж. бошқарувидаги Тошкент—Хоразм йўналишида ҳаракатланиб кетаётган Isuzu русумли юк транспорт воситаси вилоятнинг Дўстлик тумани ҳудудида тўхтатилиб, белгиланган тартибда кўздан кечирилган.
Текширув натижасида автоулов юкхонасида божхона расмийлаштирувидан ўтганини тасдиқловчи ҳеч қандай ҳужжатлари бўлмаган, тегишли қонун талабларига кўра маркировкаланмаган, умумий қиймати 316 миллион сўмлик жами 76 дона телевизор борлиги аниқланган.
Шунингдек, Фарғона вилояти божхона бошқармасининг тезкор ходимлари ҳамда вилоят Давлат хавфсизлик хизмати вакиллари ҳамкорлигида катта миқдордаги телевизорларнинг мамлакатга айланма йўллар орқали олиб кирилишининг олди олинган.
Ўтказилган тезкор тадбирда Лоғон—Фарғона йўналишида ҳаракатланаётган фуқаро М.А. бошқарувидаги Cobalt русумли автомашина кузатувга олиниб, Фарғона шаҳрида жойлашган фуқаро Г.Д.нинг яшаш хонадонига кирган вақтида холислар иштирокида кўздан кечирилган. Натижада автомашина салони ва юкхонасида хорижда ишлаб чиқарилган, тегишли ҳужжатлари бўлмаган, 2 турдаги жами 27 дона телевизор борлиги аниқланган. Шундан сўнг тадбир иштирокчилари томонидан мазкур хонадон ҳам кўздан кечирилганида, у ерда ҳам ҳужжатлари бўлмаган 5 турдаги 43 дона телевизор сақланаётгани маълум бўлган.
Бундан ташқари, Водил—Олтиариқ йўналишида ҳаракатланаётган фуқаро М.Н. бошқарувидаги Cobalt русумли автотранспорт воситаси Фарғона тумани ҳудудида тўхтатилиб кўздан кечирилганида, мазкур автомашина салони ва юкхонасида ҳам хорижда ишлаб чиқарилган, божхона расмийлаштирувидан ўтганини тасдиқловчи ҳужжатлари бўлмаган, қиймати 41,3 миллион сўмлик 2 турдаги, жами 15 дона телевизор борлиги аниқланган.
Фарғона вилояти Миллий гвардия ходимлари билан ҳамкорликда Фарғона туманида ўтказилган тезкор тадбир давомида эса фуқаро Э.З. ва I.Х.га тегишли бўлган хонадонлар белгиланган тартибда кўздан кечирилган. Кўздан кечириш жараёнида ҳеч қандай ҳужжатларсиз, умумий қиймати 47,7 миллион сўмлик жами 34 дона телевизор сақланаётгани ошкор бўлган.
Умумий ҳисобда, Фарғона вилояти божхона бошқармаси тезкор ходимлари томонидан ўтказилган тезкор тадбирлар давомида дастлабки қиймати 232,3 миллион сўмлик, жами 119 дона телевизорнинг ноқонуний олиб кирилиши ва сақланишига чек қўйилган.
Ҳозирда ушбу ҳолатлар юзасидан божхона органлари томонидан суриштирув ҳаракатлари давом эттирилмоқда.
Аввалроқ Фарғонада 405 миллион сўмлик телевизорларнинг ноқонуний айланмасига чек қўйилгани тўғрисида хабар берилганди.
Изоҳ (0)