Баҳодир Йўлдошев ва Римма Аҳмедова ўзбек санъатида ўз ўрнини қолдирган ижодкорлар ҳисобланади. Улар уч фарзандни камолга етказишди. Улардан бири Бобур Йўлдошев ота-онасининг фаолиятини давом эттириб, актёр бўлди. Унинг отаси қанчалик машҳур режиссёр бўлмасин, ўғлини қўлидан етаклаб кино оламига олиб келмаган.У илк марта кўчада газли сув ичаётганида тасодифан кинокадрда кўриниб қолган.
“Ота-онамнинг машҳурлигини ҳис қилмаганман”
Бобур Йўлдошев 1979 йилнинг 16 январь куни Тошкент шаҳрида дунёга келган. У икки қиздан кейин туғилган ўғил бўлгани учун ҳам ота-онасини янада севинтирган.
— Мен туғилганимда отам Москвадан Попов медалини олиб қайтаётган бўлган. Аэропортда Тўти опанинг турмуш ўртоқлари Мирғиёс Соатов суюнчи олган экан. Исмимни эса отамнинг дадаси, бобом раҳматли қўйган. Болаликда жуда шўх, ўйинқароқ бола бўлганман. Отам театрда, онам эса дубляжда ишларди. Гоҳ театрга, гоҳ дубляж студиясига олиб боришарди. Уйимизда шунчаки суҳбатлар бўлганини, ота-онам бекор ўтирганини эслолмайман. Уларнинг иккиси ҳам кўп китоб ўқирди. Тинимсиз ижод ҳақида гаплашарди. Ўша вақтда уларнинг машҳур санъаткор эканлигини ҳис қилмаганман, дейди актёр Бобур Йўлдошев.
“Тиланчиликни театрда қилма, деган”
Актёр болалиги билан боғлиқ қизиқарли воқеани сўзлаб берди.
— Ўша вақтда 5-6 ёшлардаги бола эдим. Рихсивой Авазовнинг ўғли билан собиқ Ҳамза театрининг ҳовлисида ўйнаб юргандик. Сал нарида 10 тийиндан музқаймоқ сотаётган экан. Роса егимиз келди. Шунда театрда ишлайдиган актёрлардан бири ўтиб қолди. “20 тийин беролмайсизми, роса музқаймоқ егимиз келяпти”, дедик. У пул берди-ю, аммо дадамга “Ўғлингиз кўча бошида пул сўраб турган экан, берақолдим”, дебди. Бир пайт дадам раҳматли жаҳл билан чиқиб “Тиланчиликни театрда эмас, сал нарида қилсанг бўлмайдими, бу ерда мени ҳамма танийди-ку” деганди, дейди Бобур Йўлдошев.
“Жанжалда бир йигит майиб бўлганди...”
Актёр болалигида шўх бўлгани, 13 ёшида безори болалар жанжалига гувоҳ бўлгани ҳақида сўзлаб берди.
— Эрка бўлганман, деёлмайман, чунки дадам ниҳоятда қаттиққўл инсон эди. Аммо роса шўх ва кўча ҳаётига қизиқадиган бола бўлганман. 13 ёшимда Хадрада катта жанжалнинг гувоҳи бўлганман. Ўшанда шунчаки ҳазиллашиб уришиш натижасида бир бола бутун умрга майиб бўлиб қолган. Бу гап роса овоза бўлганди. Ўшанда дадам олдига чақириб “Агар шу йўлдан кетсанг, охири вой бўлади, майиб бўлганнинг ўрнида сен ёки дўстинг бўлиши мумкин эди”, деган. Шу гапдан кейин ҳаётимни бутунлай ўзгартиришга қарор қилганман. Онам билан дубляж студияларига қатнашни бошлаганман. Кичик ёшдаги болалар ролига овоз берардим. Аммо ўзбек тилида яхши гапиролмасдим, дейди Бобур Йўлдошев.
“Тузукроқ овқат тополмаган кунларимиз ҳам бўлган”
Баҳодир Йўлдошев ва Римма Аҳмедова хонадонида туғилган Бобур Йўлдошев моддий қийинчиликларга учраганига ишониш қийин. Аммо Ўзбекистон мустақилликка эришган йиллари улар ҳам молиявий қийинчиликларга учраганини қуйидагича хотирлайди.
— 1992—93 йилларда кўпчилик қийин кунларни бошдан кечирган. Театрда ойлик йўқ, кинолар эса умуман суратга олинмай қўйган пайтлар эди. Фақатгина дубляжга чақириб туришарди, шу боис онам кўпроқ ишларди. Жуда қийин кунларни бошдан кечирганмиз. Тамакининг хумори тутганда қолдиқларини чекканман, ҳатто ейишга тузукроқ таом тополмаган кунларимиз ҳам бўлган, дейди Бобур Йўлдошев.
“Онам 10 йил саратон билан курашди”
Актёр онаси билан боғлиқ энг ширин хотиралари ва унинг оғир касалликдан вафот этгани ҳақида эслади.
— Ошни жуда яхши кўраман, кунига беш маҳал ош беришса ҳам рад этмай еявераман. Онам буни яхши билгани учун соат нечада келишимдан қатъи назар, дўппидеккина ош қилиб кутиб оларди. Кечаси келганимда ҳам биргалашиб ош ердик. Ҳамманинг онаси ўзига яхши, аммо ҳақиқатан ҳам раҳматли онам тилла аёл бўлган. Ҳеч кимга оғир гапирмасди, ақлли аёл эди. Онам 10 йил саратон билан курашди. Айниқса, умрининг сўнгги кунларида жуда қийналди. Афсуски, ўша вақтда сёмкалар ёки театрда иш сабаб ёнида кўп бўлолмадим. Ҳозир бу ҳақда ўйласам юрагим сиқилади. Ўша пайтда онамга қанчалик керак бўлганимни ҳис қиламан, дейди актёр Бобур Йўлдошев.
“Биринчи рафиқам вафот этган”
Ўтган йили актёр ўғли Диёр Йўлдошевни уйлантирди. Афсуски, бу ўғлига она меҳрини ҳис қилиш насиб этмаган. Чунки Бобур Йўлдошевнинг биринчи рафиқаси жуда эрта вафот этган.
— Биринчи рафиқам оламдан ўтган. Турмушимиздан битта ўғлимиз бор. У ҳозир биз билан яшайди. Рафиқам сигарет чекарди. Бир марта қаттиқ йўтал бўлиб қолган. Шифокорга борганимизда туберкулёз деган ташхис қўйишган ва жуда катта дозада антибиотик буюришган. Юраги катта дозани кўтара олмасдан икки кунда вафот этган. Аслида у бронхит бўлган экан.
Ўзимни ҳар доим ёлғиз ҳис этаман. Тўғри, рафиқам ва тўрт фарзандим бор. Лекин фарзандларим менинг оламимда эмас. Улар билан кечки пайт бирга телевизор кўрамиз. Лекин ҳар битта одам ёлғиз. Биз бу дунёга ёлғиз келамиз, ёлғиз кетамиз. Менинг дунёмда ҳеч ким йўқ, йўлдошлар бор. Ёлғиз қолганимда ҳеч қачон зерикмайман — китоб ўқийман, кино кўраман, дейди актёр.
Грек қизи билан оила қурган
Биринчи аёлининг вафотидан сўнг актёр грек миллатига мансуб Анна Марисина исмли қизга уйланган, икки қиз ва бир ўғил фарзандли бўлган. Актёрнинг биринчи турмушидан бўлган фарзанди билан муносабатлари яхши.
— Ҳаётда эр-хотин бир-бирини тўлдириши, куч бера олиши жуда муҳим. Бу нафақат оиладаги муҳитга, балки фарзандларнинг руҳиятига ҳам яхши таъсир қилади. Аёлимни ҳурмат қиламан, чунки у мени тушунади. Аёлим грек миллатига мансуб, актриса. Биз эртадан кечгача театрдамиз. Қаердан муҳаббат бошланади? Биз у билан битта спектаклда севишган жуфтликни ўйнаганмиз. Ўшанда унга нисбатан юрагим жиз этган. Бир-биримизга боғланиб қолганмиз, кейин турмуш қурганмиз.
Актриса бўлгани учун мени бошқа партнёрларимдан рашк қилмайди, тушунади. Мен ҳам уни бошқа актёрлардан қизғанмайман. Унга ўзимга ишонгандек ишонаман. Ишонч билан айта оламанки, битта хонага 50 та эркак билан киргизиб юборсам ҳам у тоза чиқади. Қанақа қилиб оила бўлиши мумкин, агар эркак ва аёл бир-бирига ишонмаса?, дейди актёр Бобур Йўлдошев.
“Менга шунчаки омад кулиб боққан”
Актёр ўзини у қадар қобилиятли деб билмаслиги, шунчаки муҳим вазиятда омад кулиб боққани ҳақида айтди.
— Ота-онанинг қобилияти ҳар доим ҳам фарзандда такрорланмайди. Агар шундай бўлганида мен энг зўр режиссёр ёки дубляж қироли бўлишим керак эди. Менимча, бу борада табиат хатога йўл қўйган. Ўзимни қобилиятли актёр деб билмайман. Шунчаки омад кулиб боққан. Чунки йилига элликдан зиёд актёр ва актрисалар институтни тамомлайди. Уларнинг ҳаммасига ҳам омад кулиб боқмайди.
Менга омад олиб келган рол шубҳасиз “Сардор” ва “Остона” сериаллари бўлган. Ундан кейин “Севинч”, дейди актёр.
“Режиссёр бу ролни беришни истамаган”
Бобур Йўлдошев “Ватан” фильмида Қурбон ролини ижро этишни истагани аммо режиссёр бу ролни Музаффар Саъдуллаевга бергани ҳақида гапирди.
— Бир марта имкон беринг, Қурбонни ижро этай деб роса сўраганман. Аммо Зулфиқор Мусоқов мени бу ролда кўролмаган. Ўйлаб қарасам, бу тўғри танлов бўлган, нафақат мен балки бошқа актёр ҳам уни Музаффардек ишончли ижро этолмасди. Режиссёрнинг ютуғи ҳаммасини олдиндан кўра олишида деб бежиз айтишмайди. “Ўтов” фильмидаги ота ролини ҳам ижро этгим келади. Нозим Тўлахўжаев ролни маромига етказиб ижро этган, аммо мен ҳам шу ролда ўзимни кўргим келган. Унда катта дард ва ички алам бор, дейди актёр Бобур Йўлдошев.
“Ойлик жуда кам”
Бобур Йўлдошев тўй хизматларига чиқмайдиган саноқли актёрлардан бири ҳисобланади.
— Театримиз категорияси бўлмагани учун ойлигимиз жуда кам. Менинг асосий даромадим — кино, клип ва реклама сёмкаларидан. Биринчи марта Нигора Каримбоева билан Тимур Мусоқовнинг тўйида бошловчилик қилганмиз. Шундан кейин кўпинча Нилуфар Сотиболдиева билан бирга тўйга чиқардик. Бир куни кимнингдир тўйини олиб бораётганимда тўйхонага дадам келиб қолганлар. Шундан кейин дадам менга телефон қилиб, “Ўғлим, тўйда бошловчилик қилиш таклифи келса, менга телефон қил, ўша пулни ўзим бераман, бошқа тўйга чиқма”, деганлар, дейди актёр.
Нафақага чиққан актёр
Бобур Йўлдошев 28 йил давомида Ёш томошабинлар театрида фаолият юритиб, нафақага чиққан. Айни пайтда отаси Баҳодир Йўлдошев асос солган “Дийдор” театр студиясига раҳбарлик қилади. Студияда Акбархўжа Расулов, Юлдуз Ражабова ва Адиз Ражабов каби машҳур актёрлар ҳам ишлайди.
Изоҳ (0)