Бош вазирнинг молия-иқтисодиёт ва камбағалликни қисқартириш масалалари бўйича ўринбосари — иқтисодий тараққиёт ва камбағалликни қисқартириш вазири Жамшид Қўчқоров ҳоким ёрдамчилари билан боғлиқ жараёнда хато-камчиликлар борлигини тан олди. Бу ҳақда у ҳоким ёрдамчилари фаолияти ва истиқболдаги вазифаларига бағишланган матбуот анжуманида маълум қилди, дея хабар берди «Дарё» мухбири.
Тизимдаги камчиликларни тан оламиз ва танқидни тўғри қабул қиламиз, — деди иқтисодий тараққиёт ва камбағалликни қисқартириш вазири Жамшид Қўчқоров.
Матбуот анжуманида сўз олган «Дарё» мухбири ҳоким ёрдамчилари фаолиятини баҳолашда баллик тизимга эътибор қаратилаётгани ва энг юқори балл оилавий корхона ташкил қилган ҳоким ёрдамчиларига берилишини айтиб, бу тизим оилавий корхоналар фаолияти ривожланиши қийин бўлган чекка ҳудудларда оилавий корхоналар номига ташкил этилишига сабаб бўлаётганини айтди ва президент Шавкат Мирзиёевнинг Олий Мажлисга мурожаатномасида айтилганидек, ҳокимларга топшириқ беришда ҳудудлар имконияти ҳисобга олиниши айтилгани каби ҳоким ёрдамчиларига топшириқ бериш, уларнинг фаолиятини баҳолашда ҳам ҳудуддан келиб чиқиш адолатли бўлармиди, дея савол берди.
Мазкур саволга жавоб берган Жамшид Қўчқоров ҳақиқатан ҳам ҳоким ёрдамчилари фаолиятини баҳолашда хато-камчликларга йўл қўйилаётганини, уларнинг фаолиятини баҳолашда ҳудудлар имконияти ҳисобга олиниши кераклигини тан олди ва 2023 йилдан мазкур ҳолатга эътибор берилишини билдирди.
Бизнинг яна бир камчиликларимиздан бири ҳоким ёрдамчилари фаолиятини баҳолашда уларнинг касб-ҳунарга ўқитишга юборганликларини ҳам инобатга олганимиз бўлган. Мен ҳам кўпчиликни ўқишга юборишим мумкин, аммо унинг ўқиш-ўқимаслиги бу иккинчи масала-ку, яъни бу маълум бир натижага йўналмаган. Шу сабаб ҳоким ёрдамчилари фаолияти баҳоланаётганда бу баҳолаш механизмини чиқариб ташласак, адолатли бўлар экан. Тўғри, камчиликларимиз етарли. Аммо яна бир марта такрорлайман, биз камчиликларимиздан уялмаймиз, танқидни тўғри қабул қиламиз, — деди Жамшид Қўчқоров.
Жамшид Қўчқоровнинг қўшимча қилишича, 2022 йил давомида республика бўйича фаолият юритувчи 9300 нафар ҳоким ёрдамчисидан 998 нафари ишдан олиниб, алмаштирилган.
Изоҳ (0)