Тошкент шаҳар ҳокими Жаҳонгир Ортиқхўжаевнинг тонгга қадар давом этаётган сайёр қабуллари, ҳатто унинг ўринбосарларига ҳам малол келаётгани хабар берилганди. Мазкур ҳолат жамоатчиликка ошкор қилингач, Тошкент шаҳар давлат Меҳнат инспекцияси мазкур ҳолатни назоратга олгани, ҳолат юзасидан ўрганиш натижалари маълум қилиниши билдирганди.
Меҳнат инспекциясининг ҳолатни ўрганамиз дейиши шаҳар ҳокимини илҳомлантирдики шекилли, ҳокимлик расмий каналида қабуллар кечаси 02:00 ва ундан кечгача давом этиши ҳам расман эълон қилинадиган бўлди.
Мазкур вазиятни илғаган журналист ва блогер Муҳрим Аъзамхўжаев шундай ёзади: «Ортиқхўжаев Юнусободнинг ‘Оқтепа’ маҳалласида қабул ўтказди. Қабул соат 21:00 да бошланиб, 02:00 га қадар давом этди. (ҳокимлик қабул вақтини аниқ-тиниқ ёзадиган бўлибди, «хўш, меҳнат инспекцияси, қўлингдан нима келади?», деб ўчакишгандек; соат тунги 2:00 да қонунлар ҳам ухласа керак).
Ортиқхўжаевнинг матбуот котиби раҳбарлик қилаётган ҳокимлик ахборот хизмати шаҳар ҳокими қонунни бузаётгани ёзилган ҳолатга жавобан қабуллар жамланмаси акс этган видеоролик тайёрлади. Ва гўёки мана қабуллар қонунни бузиб ўтказилаётган бўлса-да, натижаси ҳавас қиларлик дегандек бўлди. Мазкур видеороликка эътибор қаратган журналист Аброр Зоҳидов ҳақли саволни ўртага ташлади: «Ҳоким бу маблағларни қаердан оляпти, қайси қонунчиликка асосан ва қандай тоифага тарқатяпти?». Бироқ, мазкур савол жавобсизлигича қолди.
«Жамиятимиз жуда қизиқ, тезкор ўзгарувчан. Қонунларга эмас, ҳис-туйғуларга бўйсунувчан. Чиндан ҳам муҳтожга бир лаҳзада уй, ташаббускор ўқитувчига машина, беморга зарур восита, ночорга керакли маблағни шундоққина бериб юбориш катта гап. Лекин ҳоким бу маблағларни қаердан оляпти, қайси қонунчиликка асосан ва қандай тоифага тарқатяпти? Булар энди одатда жавобсиз савол. Ортиқхўжаевнинг нияти яхшилигига шубҳа йўқ, лекин у ўзи билиб ёки билмай пандора қутисини очиб юборди. Ҳокимият атрофи ҳам, бошқа ҳар қандай қабулхоналар ҳам янги ва янги мурожаатчиларга тўлиб кетди. Бу ерда ҳокимликнинг PR хизмати ҳам роликдаги ҳис-туйғуларга зўр бериб, жиддий камчиликка йўл қўйишган – яъни ҳоким ҳар қандай масалани шу онда ҳал қилиб берувчи инсон сифатида тасвирланган. Катта эҳтимол билан бу қабулларда айрим мурожаатлар асослантирилган ҳолда рад этилган бўлиши керак, лекин улар кўрсатилмаган. Янги мурожаатчилар ҳам видеороликни кўришган ва табиий савол билан келишмоқда: ‘Бу лавҳадагиларга берилган экан, нега менга берилмайди?’. Умуман, муаммоси дарҳол ҳал қилинувчилар қандай тамойиллар асосида танлаб олинган? Танланганми ўзи? Агар муаммоларни тизим орқали эмас, батамом ‘ручной’ ечишга ўтилган экан, бундай қабуллар давом этадими, кейингиси қачон ва қаерда бўлади?», дейди журналист Аброр Зоҳидов.
Журналист ва ҳуқуқшунос, Ўзбекистон журналистлари ижодий уюшмаси раиси Олимжон Ўсаров ҳокимлик ахборот хизмати тарқатган видеороликни олқишлаб, пойтахт ҳокимининг қонунбузилишга қўл ураётгани ҳақида ОАВда ёзилган мақолага муносиб жавоб дея баҳолади.
Telegram’даги «Каинбек» канали пойтахт ҳокимининг иши назоратга олинганини маълум қилиб, ҳолат текширилишини овоза қилган Тошкент шаҳар давлат Меҳнат инспекцияси хатти-ҳаракатига баҳо бериб, «Айланиб кетай, 20 кундан бери шуни кўрмаяптимикин инспекция?», деганди.Бандлик ва меҳнат муносабатлари вазирлиги Жаҳонгир Ортиқхўжаевнинг қонунни бузиб, тунда қабул ўтказаётганига эътибор қаратганига салкам 20 кун бўлди. Бироқ, ўтган вақт ва фурсат на вазирлик ва на Тошкент шаҳар давлат Меҳнат инспекцияси ўрганиш натижалари ҳақида маълумот бермади. Пойтахт ҳокими эса очиқчасига қонунларни оёқости қилишда давом этмоқда.
«Дарё»да эълон қилинган дастлабки мақолада Жаҳонгир Ортиқхўжаевнинг тундаги қабули ва унда қатнашаётган ҳоким ўринбосарлари, шунингдек масъулларга, айнан шаҳар ҳокимлигидан ташқари бошқа ташкилот ва идора вакилларига ҳам ишдан ташқари ҳамда тунги вақтдаги ишга жалб қилингани учун қўшимча ҳақ тўланиши лозимлиги таъкидланганди. Бироқ, шаҳар ҳокимлиги «Бу қабулларда иштирок этаётган ходимларни қўшимча моддий рағбатлантириш ҳозирча кўзда тутилмаган», дея аниқ жавоб берганди. «Дарё» манбаси мазкур ҳолат ҳалигача ўзгаришсиз қолаётганини, ҳокимлик ходимларини ишдан ташқари ва тунги пайтдаги ишларга жалб қилгани учин қўшимча ҳақ тўламасдан келаётганини айтмоқда.
Мустақил журналист, публисист Telegram’даги «Сафар» канали админи Нозим Сафаров ҳам мазкур масалага эътибор қаратиб, «Тошкент шаҳар Давлат меҳнат инспекцияси ўз назоратига олган ҳолат, унинг ўрганиш натижалари нима бўлди? Ёки ҳалиям ўрганиш тугамаганми?», дея фикр билдирган.
Шунингдек, у «‘Ҳокимлик қабулларда иштирок этаётган ходимларни қўшимча моддий рағбатлантириш ҳозирча кўзда тутилмаган’, деганди. Ҳозир ҳам шундаймикин? Қонунлар нима дейди ўзи?’, деган саволни ўртага ташлайди.Ҳуқуқшунос Саидали Мухторалиев эса мазкур вазиятда Меҳнат кодексининг икки моддасидаги ҳолат яъни иш вақтидан ташқари иш ва тунги вақтдаги ишга жалб қилиш ҳолати борлигини, бунинг учун эса албатта ходимнинг розилиги олиниши кераклигини, шунингдек Меҳнат кодексининг 157- ва 158-моддаларга кўра ходимни иш вақтидан ташқари ишга жалб қилиш учун камида икки ҳисса миқдорда, тунги ишга жалб қилиш учун эса одатдаги иш ҳақидан камида бир ярим баравар кўп миқдорда ҳақ тўланиши кераклигини билдирганди.
«Дарё»нинг бу ҳақдаги сўровига жавоб берган Бандлик ва меҳнат муносабатлари вазирлиги ахборот хизмати раҳбари Мавжуда Мирзаева ҳолатни шундай баҳолади: «Журналистлар шаҳар ҳокимининг тунги қабуллари юзасидан савол беришаяпти, менинг матбуот котиби сифатида ҳам, шахс сифатида ҳам жавобим шу — ҳоким меҳнат қонунчилигини бузяпти, аммо одамлар муаммосини ҳал қиляпти».
Мавжуда Мирзаевнинг қўшимча қилишича, мазкур ҳолат юзасидан тақдимнома тайёрланган бўлиб, ҳолат якунига етказилади ва қонунбузилишга қарши, албатта, чора кўрилади.
Изоҳ (0)