Ўзбекистоннинг бешта туманига бугун, 17 октябрь куни ҳокимлар тайинланди. Туманларнинг собиқ ҳокимлари маълум сабаблар билан ишдан олинган. Янги ҳокимларни эса ўзига хос бир жиҳат боғлаб туради – уларнинг барчаси маълум соҳаларнинг вазир ўринбосаралари лавозимида иш олиб борган.
Жумладан, Сардоба тумани ҳокими этиб тайинланган Акмал Мирзаев тайинловга қадар сув хўжалиги вазирининг ўринбосари лавозимида ишлаган. Азизбек Латифжонов бугун Пахтаобод тумани ҳокими лавозимига тайинланган бўлса, у бунга қадар фавқулодда вазиятлар вазирининг моддий-техника ва молия-иқтисодиёт бўйича ўринбосари лавозимида ишлаган. Шунингдек, бунга қадар Ветеринария ва чорвачиликни ривожлантириш давлат қўмитаси раисининг ўринбосари лавозимида ишлаган Сирожиддин Бердиқулов Нуробод тумани ҳокими этиб тайинланди. Бундан ташқари, Давлат хизматини ривожлантириш агентлиги масъул ходими лавозимида ишлаган Ҳамидулло Иномов Фарғона тумани ҳокими этиб тайинланди. Монополияга қарши курашиш қўмитаси раис ўринбосари лавозимида ишлаган Бекзод Умматов эса Асака тумани ҳокими этиб тайинланди.
Рўйхатда саналган бешта туманнинг тўрттасида ҳокимлар сентябрь ойи охирида ишдан олинганди. Президент администрацияси раҳбари томонидан ўтказилган видеоселектор йиғилишда ушбу ҳокимларнинг нафақат ишда камчиликка йўл қўйгани, балки ишдан ташқари вақтда ҳам турли салбий ҳолатларни юзага келтиргани айтилганди.
Жумладан, Андижон тумани собиқ ҳокими Абдужаббор Эгамбердиевнинг ҳокимлик биноси ҳовлисида фуқаролар учун бўлиб ўтган сайёр қабули кенг муҳокамаларга сабаб бўлганди. Унда ҳоким айвон ичида ўтириб, фуқароларни эса айвонда ташқарига ўтқазиб мулоқот қилган. Буни ҳокимлик ижтимоий масофа сақлаш учун қилинган, деб изоҳлаган эди.
Фарғона тумани ҳокими собиқ Шуҳратжон Мўминовга нисбатан эса ер сотиш бўйича жиноят иши қўзғатилгани ҳақида айтилганди. Шунингдек, Асака тумани собиқ ҳокими Мансур Алихонов ер муносабатларини тартибга солишга оид қонунчилик ҳужжатларига риоя этмагани, фаолиятида йўл қўйган бошқа жиддий қонун бузилиш ҳолатлари учун лавозимидан озод этилган. Бундан ташқари, Пахтаобод тумани ҳокими Элёр Усмонов ноқонуний ва лавозимига мос келмайдиган хатти-ҳаракатлари сабабли ишдан бўшатилганди.
Давлат раҳбари 6 октябрь куни Сирдарё вилоятига ташрифи чоғида вилоятдаги қатор раҳбарлар, хусусан, бир қатор туман ҳокимлари ишига совуққонлик билан ёндашгани, масъулиятсизлик қилгани сабаб ишдан олиниши ҳақида айтилганди. Сардоба тумани ҳокимининг ишдан олиниши ҳам бугун бежизга эмас.
Таъкидлаш лозимки, президент Шавкат Мирзиёев йил бошида маълум соҳаларда ўзини кўрсатган кадрларни келгусида туман ва шаҳарларга ҳоким ва ҳоким ўринбосари лавозимига тайинлаш бўйича гапирганди. Бугун ўз лавозимларига тайинланган ушбу ҳокимлар эса давлат раҳбари айтган ва таъбир жоиз бўлса, узоқ муддат давомида синовдан ўтган кадрлар ҳисобланади.
Хўш, энди ҳудудларда ўзгаришлар бўладими? Ушбу ҳокимлар бундан аввалги лавозимларида ўз соҳалари бўйича қатор камчиликларни бартараф эта олган ҳисобланади. Дейлик, Сардоба тумани, ўзи умуман, Сирдарё вилояти қишлоқ хўжалиги ривожланаётган, пахта ва бошқа полиз экинлари борасида юқори ўринларда турадиган вилоят. Бироқ ҳудудда узоқ йиллардан буён кўплаб муаммолар юзага келган ва уларни бартараф этиш зарур. Сув хўжалиги вазирлигида ишлаган, бўлганда ҳам вазир ўринбосари лавозимида ишлаган кадр, албатта, бундай ҳудудда ўзини кўрсатиши зарур.
Ёки бўлмаса юқорида айтиб ўтганимиз, Асака туманида ер муносабатларини тартибга солишга оид қонунчилик ҳужжатларига риоя этилмаган. Ушбу туманга ҳоким бўлган масъул Монополияга қарши курашиш қўмитасида ишлагани, мавжуд муаммоларни ечишда катта ишни бажара олишига ишонч билдирилди.
Мамлакатнинг ҳар бир нуқтасини ривожлантириш борасида айни ўша ҳудуд раҳбари, яъни ҳокимнинг ўрни катта. Бугунги кунда ҳокимлар тўрачилик кайфиятига берилмасдан, ўз ишига қаттиқ киришса, лавозимини суиистеъмол қилмасдан, фақат ва фақат давлат ривожи учун ишласа, аҳолининг фаровон яшашига хизмат қилиши мумкин.
Муаллиф: Оғабек Самисов
Изоҳ (0)