Ўзбекистон, Озарбайжон ва Қозоғистон республикалари энергетика компаниялари томонидан “яшил коридор” лойиҳаси бўйича қўшма корхона ташкил этилди, деб хабар бермоқда “Ўзбекистон миллий электр тармоқлари” матбуот хизмати.
Маълум қилинишича, 1 июль куни Озарбайжоннинг Азеренержи ОАЖ, Ўзбекистоннинг “Ўзбекистон миллий электр тармоқлари” АЖ ва Қозоғистоннинг KEGOC АЖ вакиллари Бокуда фаолият юритадиган Green Corridor Alliance МЧЖ қўшма корхонасини таъсис этиш ва унинг уставини тасдиқлаш тўғрисидаги битимни имзолади.
Лойиҳанинг амалга оширилиши Европага “яшил” энергия экспортини амалга оширилишида муҳим аҳамият касб этади.
Озарбайжон, Қозоғистон ва Ўзбекистон ўртасида “яшил коридор” лойиҳаси
2023 йилнинг ноябрида Бокуда электр энергиясини ишлаб чиқариш ва экспорт қилиш масалалари бўйича Ўзбекистон, Озарбайжон ва Қозоғистон вазирлари уч томонлама учрашуви бўлиб ўтганди. Унда томонлар Озарбайжон орқали Марказий Осиё давлатларидан Европага электр энергиясини экспорт қилиш имкониятларини кўриб чиққан. Ўзбекистон, Озарбайжон, Қозоғистон Европага “яшил” энергия экспорт қилиш бўйича техник шартларни тайёрлашга, шунингдек, лойиҳани амалга ошириш учун қўшма корхона яратиш истиқболларини ўрганишга келишилганди.
2024 йил ноябрида Ўзбекистон, Озарбайжон ва Қозоғистон раҳбарлари “яшил” энергияни ривожлантириш ва узатиш лойиҳасига старт берди. Тадбирда сўзга чиққан Шавкат Мирзиёев қайта тикланувчи энергия иқтисодий мақсад эмас, балки келажакка қўшилаётган ҳисса, келгуси авлодлар олдидаги масъулият туйғусининг натижаси эканлигини таъкидлади.
Энергетика вазирлиги раҳбари Жўрабек Мирзамаҳмудов Каспий денгизи туби бўйлаб электр кабелини ўтказиш бўйича Қозоғистон—Ўзбекистон—Озарбайжон қўшма уч томонлама лойиҳаси муваффақиятли амалга оширилса, Ўзбекистон 2030 йилдан бошлаб ортиқча электр энергиясини Европага экспорт қила олишини айтганди.
2024 йил декабрида мамлакатларнинг тизим операторлари (Ўзбекистондан — “Ўзбекистон миллий тармоқлари” АЖ, Қозоғистондан — KEGOC АЖ, Озарбайжондан — Азеренержи ОАЖ) томонидан “Яшил йўлак” лойиҳаси доирасида таъсис шартномаси имзоланди. Томонлар Озарбайжоннинг Боку шаҳрида лойиҳани амалга ошириш бўйича қўшма корхона ташкил этиш таклифини қабул қилди.
Президентнинг 2025 йил 14 мартдаги қарори билан Озарбайжон, Қозоғистон ва Ўзбекистон ўртасида “яшил” энергияни ривожлантириш ва узатиш соҳасида стратегик шериклик тўғрисидаги битим тасдиқланди.
Узатиладиган энергия — бу шамол ва қуёш энергияси бўлиб, қайта тикланадиган ва тоза манба ҳисобланади ҳамда иқлимга таъсирни юмшатиш имконини беради.
Изоҳ (0)