14 ноябрь куни Бокуда электр энергиясини ишлаб чиқариш ва экспорт қилиш масалалари бўйича Ўзбекистон, Озарбайжон ва Қозоғистон вазирлари уч томонлама учрашуви бўлиб ўтди, деб хабар бермоқда Инвестициялар, саноат ва савдо вазириги матбуот хизмати.
Суҳбат чоғида муқобил манбалардан ишлаб чиқарилган электр энергиясини минтақа давлатлари ҳудудлари орқали учинчи давлат истеъмолчиларига ўтказишни ташкил этиш лойиҳасини амалга ошириш истиқболлари муҳокама қилинган.
Қозоғистон энергетика вазирлиги матбуот хизматининг маълум қилишича, томонлар Озарбайжон орқали Марказий Осиё давлатларидан Европага электр энергиясини экспорт қилиш имкониятларини кўриб чиққан. Ўзбекистон, Озарбайжон, Қозоғистон Европага “яшил” энергия экспорт қилиш бўйича техник шартларни тайёрлашга, шунингдек, лойиҳани амалга ошириш учун қўшма корхона яратиш истиқболларини ўрганишга келишди.
Учрашув якунида ушбу давлатлар ўртасида қўшма коммюнике имзоланиб, унда мамлакатларнинг қайта тикланувчи энергия соҳасидаги салоҳияти ва муқобил манбалардан олинадиган электр энергиясини Европага экспорт қилиш лойиҳасига қўшилишга тайёрлиги қайд этилган.
“Яшил” электр энергиясини узатиш лойиҳасини ҳаётга татбиқ этиш иқтисодиётимиз ва энергетика тизимларимиз ўртасидаги алоқаларни мустаҳкамлашга ёрдам беради, шунингдек, миллий энергетика тармоқларини ривожлантиришга замин яратади ва биз ушбу ташаббусни муваффақиятли амалга ошириш учун биргаликдаги ишларга ҳисса қўшишга тайёрмиз, — деган инвестициялар, саноат ва савдо вазири Лазиз Қудратов.
Изоҳ (0)