Чет элда 90 кундан ортиқ бўлиб қайтган Ўзбекистон фуқароларини ҳамда меҳнат фаолиятини амалга ошириш учун мамлакатга келган хорижликларни тиббий кўрикдан ўтказиш таклиф қилинмоқда. “Миллий тикланиш” демократик партияси фракцияси йиғилишида бу борада Ўзбекистон айрим қонун ҳужжатларига ўзгартириш ва қўшимчалар киритиш тўғрисидаги қонун лойиҳаси муҳокама қилинди.
Таъкидланишича, меҳнат миграцияси ҳажмининг ортиши, хорижда бўлиб қайтаётган фуқаролар сонининг кўпайиши ҳамда чет эл фуқароларининг Ўзбекистон ҳудудига кириб келиши инсон саломатлиги учун хавф туғдирувчи юқумли касалликларни барвақт аниқлаш ва уларнинг тарқалишининг олдини олиш чора-тадбирларини кучайтириш заруратини юзага келтиряпти.
Ушбу қонун лойиҳаси инсон учун хавфли бўлган юқумли касалликларнинг олдини олиш мақсадида ишлаб чиқилган бўлиб, унда 90 кундан ортиқ муддатда чет элда бўлиб қайтган Ўзбекистон фуқароларини ҳамда меҳнат фаолиятини амалга ошириш учун мамлакатга келган хорижликларни тиббий кўрикдан ўтказиш назарда тутилмоқда.
Хусусан, узлуксиз 90 кун ва ундан ортиқ муддат давомида чет элда бўлиб қайтган 18 ёшдан 60 ёшгача бўлган Ўзбекистон фуқаролари, Ўзбекистон ҳудудида доимий яшайдиган чет эл фуқаролари ва фуқаролиги бўлмаган шахслар ҳамда меҳнат фаолиятини амалга ошириш учун республикага кириб келаётган чет эл фуқаролари ва фуқаролиги бўлмаган шахсларни мажбурий равишда ОИВга тиббий текширувдан ўтказиш белгиланмоқда. Текширувлар давлат ҳисобидан амалга оширилади.
Йиғилишда ташаббускорлар депутат Шерзод Қулматовнинг нима учун 90 кун белгиланаётгани масаласига изоҳ бераркан, бу юқумли касаллик инсон организмида 90 кундан сўнг ўзини намоён қилишини қайд этди. У шунингдек, чет элдан қайтган фуқаро агар ўзининг, оиласининг соғлиғини ўйласа, тезда тиббий кўрикдан ўтиши лозимлигини билдирди.
Муҳокамалардан сўнг, қонун лойиҳаси депутатлар томонидан қўллаб-қувватланди.
Маълумотларга кўра, ўтган йили хорижда бўлиб қайтган 1,7 миллион фуқаронинг 434 минги, яъни 25 фоизи ихтиёрий ОИВ/ОИТС текширувидан ўтган ва уларнинг 1512 нафарида ушбу касаллик аниқланган. Қонунчиликда бу борада мажбурий тиббий кўрик бўлмагани учун аксарият фуқаролар текширувга келмаяпти.
Изоҳ (0)