Ўзбекистонда 2030 йилга бориб ОИTС касаллиги юқишига тўлиқ барҳам бериш мақсад қилинган. Бу ҳақда Санитария-эпидемиологик осойишталик ва жамоат саломатлиги қўмитаси, Республика ОИTСга қарши кураш маркази масъуллари иштирокида ўтказилган матбуот анжуманида маълум қилинди.

Қайд этилишича, ҳозирги вақтда республикада 48 мингдан ортиқ шахсда ОИВ касаллиги ташҳисланган. Сўнгги 5 йилда ОИВ инфекциясига текширувлар сони 700 мингдан 3,5 миллионга ёки 5 баробарга ортган. Ҳукумат томонидан дори воситаларини молиялаштириш 80 фоизни ташкил этган.

Республикада ОИВ инфекциясини онадан болага юқишига барҳам бериш учун ҳар йили бемор оналардан дунёга келаётган (ўртача 600 нафаргача) болаларни қуруқ сут аралашмалари билан узлуксиз  таъминланмоқда. Бунинг натижасида 99,7 фоиз болалар соғлом бўлишига эришилмоқда.

2030 йилга бориб ОИВ эпидемиясига барҳам бериш учун 2025 йилга қадар “95-95-95” стратегиясига эришиш зарур.

“95-95-95” тамойилига кўра, ОИВ юқтирган беморларнинг 95 фоизи ўз статусини билиши, беморларнинг 95 фоизи махсус терапия билан қамраб олиниши, беморларнинг 95 фоизида вирус юкламаси паст даражага тушишига 2025 йилгача эришиш ва 2030 йилда ОИTС касаллигининг юқишига барҳам бериш мақсад қилинган.

2022 йил февраль ойида Ўзбекистонда 45 минг нафар одамлар ОИTС (СПИД) билан яшаб келаётгани маълум қилинганди. Уларнинг 55 фоизи эркаклар, 45 фоизи аёллар, 14 фоизини эса 18 ёшга тўлмаган болалар ташкил этади. ОИTС билан касалланиш кўрсаткичи юқорилиги ички миграция ҳамда аҳоли сонининг кўплиги ҳисобига Тошкент шаҳри ҳамда Тошкент вилоятига тўғри келмоқда.