Тошкентдаги ЖАР стадионида санъаткорлар ва блогерлар ўртасида ўтказилган футбол турнирида жамоат тартибини бузган иштирокчиларга суд томонидан қонуний чора кўрилди.
Пойтахт ИИББ матбуот хизматининг маълум қилишича, вазият юзасидан Шайхонтоҳур тумани ИИО ФМБ томонидан текширув ўтказилиб, турнир иштирокчилари билан профилактик суҳбат олиб борилган. Like Cup лойиҳаси жамоатчилик ўртасида кескин эътирозлар келтириб чиқаргани ва ҳуқуқбузарлик содир этилишига сабаб бўлгани учун вақтинча тўхтатилган.
Тўполонни бошлаган блогернинг айтишича, у бу ишни ҳар иккала жамоа аъзолари билан келишган ҳолда амалга оширган. Гўёки икки жамоа ўртасидаги жанжал саҳналаштирилган. Мақсад эса обуначиларни кўпайтириш, ўйинга омма эътиборини қаратиш ва пиар бўлган.
“Ўзи бу олдиндан келишилган эди, мисол учун жанжаллашиб кетишимиз. Бу — пиар-да, шоу қилмоқчи бўлганман. Мен энди янги чиққан блогерман, ўзимга хайп ишламоқчи бўлдим. Халқдан кечирим сўрайман, бу иш бошқа такрорланмайди”, деган жанжалда қатнашган блогер.
“Жуда катта хато бўлди, яъни биз ташкилотчилар томонидан ва қолаверса, мана шу эпизодни юзага келтирган айрим бир футболчилар тарафидан хунук ҳолат юзага келди ва бу ҳолат бир маданият ходими сифатида мени ўзимга жуда қаттиқ таъсир қилди. Биз тарафдан мана шуни назоратга ололмаганимиз, уларнинг ҳиссиётларини биз назоратга ололмаганимиз ташкилотчиларнинг катта хатоси бўлди деб ўйлайман. Халқимиздан ҳам шу йигитларни кўрсатган ҳунари учун узр сўрайман”, деган лойиҳа ташкилотчиси Алишер Узоқов.
Жиноят ишлар бўйича Шайхонтоҳур туман судининг сайёр суд мажлисида Алишер Узоқов, Абдураҳмон Мавлонов, Нуржалол Раҳмоналиев ва Дилшодбек Ўрозбоев Маъмурий жавобгарлик тўғрисидаги кодекснинг 183-моддаси (майда безорилик) ҳамда 194-модданинг (ички ишлар органлари ходимининг қонуний талабларини бажармаслик) биринчи қисмида кўрсатилган ҳуқуқбузарликларни содир этганликда айбдор деб топилди. Ҳар бирига БҲМнинг 10 баробари (3 миллион 750 минг) миқдорида жарима жазоси тайинланди.
Камолиддин Мамажонов ҳам шу моддалари билан айбдор деб топилиб, БҲМнинг 12 баробари (4,5 миллион сўм) миқдорда жарима жазосига тортилди, Озодбек Ўрозбоевга эса 10 сутка маъмурий қамоқ жазоси берилди.
Изоҳ (0)