Ijtimoiy tarmoqlarda futbol maydonida havaskor o‘yinchilar — blogerlar va san’atkorlar o‘zaro janjallashgani aks etgan video tarqalib, turli muhokamalarga sabab bo‘lmoqda. Mazkur holat yuzasidan IIBB ma’lumot berdi.
Unga ko‘ra, 28-may kuni taxminan soat 21:00 larda Shayxontohur tumani, “Jar” o‘yingohida Likesup loyihasi doirasida san’atkorlar va blogerlar o‘rtasida futbol bo‘yicha o‘rtoqlik uchrashuvi bo‘lib o‘tgan. O‘yin yakunlanganidan so‘ng, 2004-yilda tug‘ilgan O.O‘. ijtimoiy tarmoqlarda obunachilarini ko‘paytirish va ushbu o‘yinga ommaning e’tiborni yanada ko‘proq jalb qilish (piar) maqsadida go‘yoki jamoalar o‘rtasida janjal kelib chiqqanini sahnalashtirishgan.
Qayd etilishicha, jamoat tartibini mensimaslik va fuqarolarning osoyishtaligini buzuvchi bu kabi xatti-harakatlar uchun javobgarlik belgilangan.
Mazkur holat yuzasidan Shayxontohur tumani IIO FMB tomonidan tekshiruv o‘tkazilib, turnir ishtirokchilari bilan profilaktik suhbat o‘tkazilgan. Likesup loyihasi doirasida yuz bergan yuqoridagi holat jamoatchilik o‘rtasida keskin e’tirozlar keltirib chiqargani va huquqbuzarlik sodir etilishiga sabab bo‘lgani uchun loyiha vaqtincha to‘xtatilgan.
Hozirda mazkur holat yuzasidan loyiha tashkilotchilari, ushbu janjalni sahnalashtirganlar va unda ishtirok etganlarning barchasining shaxsi aniqlanib, ularga nisbatan Ma’muriy javobgarlik to‘g‘risidagi kodeksning tegishli moddalari bilan ma’muriy bayonnoma rasmiylashtirilib, to‘plangan hujjatlar qonuniy chora ko‘rish uchun jinoyat ishlari bo‘yicha Shayxontohur tumani sudiga yuborilgan.
Turnir tashkilotchilaridan biri hisoblangan Alisher Uzoqov mazkur holatga munosabat bildirdi:
Bu bizning jamoalar tomonidan uyushtirilgan piar edi. Ammo bu nazoratdan chiqib ketgandek bo‘ldi. Shu sababli bu holat OAVda boshqacha tarzda talqin qilinmoqda. Ta’kidlash kerakki, bu janjaldan hech kim tan jarohati olmagan. Hamma sog‘-salomat.
Izoh (0)