Сербиялик тажрибали ракетка устаси, 24 карра “Катта дубулға” турнирлари чемпиони Новак Жокович УЕФА Чемпионлар Лигасининг 2024/25 йилги мавсуми финали ҳақида фикр билдирди. У RMC Sport нашрига берган интервьюсида ҳал қилувчи баҳсда кимга мухлислик қилиши борасидаги саволга аниқ жавоб берди.
Унга кўра, Жокович “ПСЖ”га мухлислик қилиши ва бунинг сабаби ҳақида тўхталди:
Мен Чемпионлар Лигаси финалида “ПСЖ” ютишини истайман. Гарчи “Интер”га ҳурматим баланд бўлса-да, мен “Милан”нинг ашаддий мухлисиман, дейди Жокович RMC Sport нашрига берган интервьюсида.
Маълумот учун, Чемпионлар Лигаси финалида “ПСЖ” ва “Интер” жамоалари ўзаро тўқнаш келади. Ҳал қилувчи баҳс 31 май куни Германиянинг Мюнхен шаҳрида бўлиб ўтади.
Эслатиб ўтамиз, Жокович айни пайтда Парижда ўтаётган “Ролан Гаррос” турнирида иштирок этмоқда. Навбатдаги босқичда у австриялик Филип Мисоличга (ATP рейтингида 153-ўрин) қарши кортга чиқади.
Изоҳ (0)