Чилининг Пенафлор коммунасидаги стадионда юз берган отишма оқибатида 11 ёшли бола ҳалок бўлди. Бундан ташқари, 33 ёшли эркак яралангани хабар қилинмоқда. Унга камида етти марта ўқ узилган.
Бу ҳақда 24Horas нашри хабар берди.
Ҳодиса маҳаллий майдонда футбол ўйини чоғида содир бўлган, у ерда мухлислар ўртасида жанжал рўй берган. Шундан кейин стадионга номаълум одамлар ўтирган машина етиб келган ва отишма бошланган.
Маълумотларга кўра, 11 ёшли болага учта ўқ теккан. У тиббий муассасага олиб кетилаётганда йўлда вафот этган. Яна бир эркак эса оғир тан жароҳатлари билан касалхонага ётқизилган.
Маҳаллий полиция ҳодиса сабабларини аниқлаш ва айбдорларни топиш учун тергов ишларини бошлади, дея хабар қилди 24Horas нашри.
1 январь куни кечқурун Нью Йоркнинг Квинс туманидаги тунги клуб олдида содир бўлган отишмада 10 киши яраланганди.
ABC News хабарига кўра, бир гуруҳ эркаклар клуб ташқарисида навбатда турган 15 га яқин одам томонга қарата ўт очган. Яраланганларнинг барчаси 16 ёшдан 20 ёшгача бўлган йигитлар, дейди полиция.
Шунингдек, 1 январь куни Черногориянинг Сетине шаҳри чеккасидаги барда отишма содир бўлган.
Барда ўтирган эркаклардан бири атрофдагиларга қарата ўт очди, сўнг кўчага чиқиб, ўткинчиларга қарата ўқ отишни бошлади. Оқибатда камида 12 киши ҳалок бўлди, деди мамлакат ички ишлар вазири Данило Саранович.
Изоҳ (0)