Дунёдаги энг йирик спорт ташкилотларидан бири — Халқаро Ҳарбий Спорт Кенгаши (CISM) кураш спорт турини расмий равишда ўз тақвимига киритди. Бу муҳим қарор Шри-Ланканинг Коломбо шаҳрида ўтган CISM Бош Ассамблеясида қабул қилинди. Бу ҳақда Спорт вазирлиги матбуот хизмати хабар берди.
CISM 1948 йилда ташкил этилган бўлиб, бош қароргоҳи Бельгияда жойлашган. Ташкилот 140 дан ортиқ давлат аъзолигида ҳарбийлар ўртасида спорт орқали тинчлик ва дўстликни тарғиб қилади.
Курашнинг CISM томонидан тан олиниши — бу Халқаро Кураш Ассоциацияси (ИКА), Ўзбекистон Спорт вазирлиги, Қуролли Кучлар ва Кураш Федерациясининг ҳамкорликдаги саъй-ҳаракатлари натижасидир. Ассамблеяда ИКА техника директори жаноб Рави Капур тақдим этган кураш бўйича тақдимот катта қизиқиш уйғотди ва натижада бу спорт тури CISM расмий спорт турлари рўйхатига киритилди, дейилади манбада.
Кураш бўйича CISM доирасидаги илк расмий мусобақа — Кураш Чалленге Cуп — 2026 йил 5–6 сентябрь кунлари Ўзбекистонда бўлиб ўтади. Эътиборга молик жиҳати — финал куни 6 сентябрь “Жаҳон Кураш куни”га тўғри келади.
Изоҳ (0)