МОҚ бош котиби Ойбек Қосимов Прагада олимпия спорт турлари президентлари билан учрашувларни бошлади

Ўзбекистон Миллий Олимпия Қўмитаси бош котиби Ойбек Қосимов айни пайтда Чехия пойтахти Прагада бўлиб турибди, деб ёзди ташкилот матбуот хизмати. У Миллий Олимпия Қўмиталари Ассоциациясининг XXII Бош Ассамблеясида Ўзбекистон номидан иштирок этмоқда.

Қосимов Чехиядаги йирик конференцияда шунчаки иштирок этиб қайтмайди. У Олимпиада таснифига кирган бир қатор спорт турларининг жаҳондаги президентлари билан учрашиши керак. 31 октябрь куни Ўзбеистон Президенти Шавкат Мирзиёев мамлакатда спортни ривожлантириш масалаларига бағишланган йиғилиш ўтказганида, МОҚ олдига халқаро спорт федерациялари билан мустаҳкам алоқаларни тезроқ ўрнатиш вазифасини қўйганди.

Ойбек Қосимов айнан ўша миссия асосида Прагадаги конференциядан ташқари алоҳида учрашувлар ўтказмоқда. Бир неча кун давомида МОҚ бош котиби қуйидаги ташкилотлар президентлари билан учрашади:

• Пере Миро — ХОҚнинг «Олимпия Бирдамлиги» дастури директори
• Хулио Сесар Маглионе — Халқаро Сузиш Федерацияси (FINA) президенти
• Ҳайдар Фармон — Халқаро Кураш Ассоциацияси (IKA) президенти
• Ненад Лалович — Бирлашган Кураш Дунёси (UWW) президенти
• Томаш Аяйн — Халқаро Оғир Атлетика Федерацияси (IWF) президенти
• Обайд Ал-Анзи — Осиё Дзюдо Иттифоқи президенти
• Себастьян Коэ — Халқаро Енгил Атлетика Федерациялари Ассоциацияси (IAAF) президенти
• Сергей Бубка — Халқаро Енгил Атлетика Федерациялари Ассоциацияси (IAAF) вице-президенти

МОҚ бош котиби Халқаро Олимпия Қўмитаси президенти Томас Бах билан ҳам алоҳида фикрлашиб олди. Ўзбекистон делегациясининг Рио—2016 Олимпиадасидаги иштирокини юқори баҳолаган Томас Бах 2018 йил Жанубий Корея мезбонлик қиладиган қишки Олимпиада якунида, аниқроғи, март ойида Тошкентга келишга ваъда берди.

Шунингдек, Оғир Атлетика Федерацияси (IWF) президенти Томаш Айян ҳам Ойбек Қосимов билан алоҳида учрашувда бўлди. Унинг якуни эса Айяннинг 2018 йил Ўзбекистонга 2 марта ташриф буюришга берган ваъдаси билан ёдда қолди.