2025 йилги “Ролан Гаррос” финали теннис мухлисларига унутилмас қарама-қаршиликни туҳфа этди. Дунёнинг биринчи ва иккинчи рақамли теннисчилари — Янник Синнер ва Карлос Алкарас ўртасидаги баҳс ҳақиқий теннис драмаси сифатида тарихга кирди.
Учрашув 5 соат 32 дақиқа давом этди ва Франция очиқ чемпионати тарихидаги энг узоқ финал сифатида рекорд ўрнатди. Якунда эса ғалаба испаниялик Карлос Алкарасга насиб этди.
Синнер кучлироқ бошлади
Ўйинни фаолроқ бошлаган Янник Синнер биринчи сетда рақибининг тўрт брейк-пойнтини қайтариб, сетни 6:4 ҳисобида ўз фойдасига ҳал қилди. Иккинчи сетда ҳам Синнер устунлик қилди. Бироқ бу сафар Алкарас кучлироқ қаршилик кўрсатди. Янник гарчи сет давомида 5:3 ҳисобида олдинда бораётган бўлса-да, ғолиб номи тай-брейкда аниқланди. Унда италиялик теннисчи 7:6 ҳисобида ғалаба қозонди.
Алкараснинг қайтиши
Учинчи сетда ташаббусни Алкарас қўлга олди. У 5:2 ҳисобида олдинга чиқиб олганига қарамай, Синнер фарқни қисқартирди. Бироқ испан теннисчиси вазиятни қўлдан чиқармай, сетни 6:4 ҳисобида ғалаба қозонди ва ўйинга интрига қайтди.
Тўртинчи сет ҳам муросасиз кечди ва тай-брейккача чўзилди. Бу сафар руҳий устунлик Алкарас томонида эди. Айниқса, Синнер 5:4 ҳисобида олдинда бўлган ва уч бор ғалабага яқинлашган паллаларда Алкарас босим остида вазиятни сақлаб қолди ва сетни 7:6 (7:3) ҳисобида ўз фойдасига ҳал қилди.
Шу тариқа ҳар икки теннисчи иккита сетдан ютиб, баҳсни ҳал қилувчи — бешинчи сетга олиб борид.
Финал нуқтаси – тай-брейкдаги устунлик
Сўнгги сетда ҳар икки томон эҳтиёткорлик билан ҳаракат қилди. Бирор марта ҳам брейк нуқтаси кузатилмади ва ғолиб яна тай-брейкда аниқланди. Унда эса Алкарас тўлиқ устунлик қилди. У 7:0 ҳисобида олдинга ўтиб, тай-брекни 10:2 ҳисобида якунлади ва чемпионликни қўлга киритди.
Тарихий натижа
4:6, 6:7 (4:7), 6:4, 7:6 (7:3), 7:6 (10:2) — Карлос Алкараснинг финалдаги ғалабаси тарихга кирди.
Бу испан теннисчисининг “Ролан Гаррос”даги иккинчи, умумий ҳисобда эса “Катта Дубулға” турнирларидаги бешинчи чемпионлиги бўлди.
Изоҳ (0)