39 ёшли хорватиялик ярим ҳимоячи Лука Модрич “Милан” клуби билан шартнома имзолаш арафасида турибди. Футболчи аллақачон Италияга етиб келган.
Модрич Миланга келганидан сўнг клубнинг ижтимоий тармоқлардаги саҳифаси орқали жамоа мухлисларига қисқа видеомурожаат йўллади:
Ҳаммага салом! Мен ҳозиргина Миланга етиб келдим. Бу ерда бўлишдан ва фаолиятимда янги босқични бошлашдан жуда хурсандман. Ҳаммангизни яхши кўраман, — деди тажрибали футболчи.
ОАВ хабарларига кўра, Модрич “россонерилар” билан 2026 йилнинг ёзига қадар мўлжалланган шартномага имзо чекади. Унда битимни бир мавсумга узайтириш имконияти ҳам мавжуд. Унинг “Милан”даги йиллик маоши 3–3,5 миллион еврони ташкил қилиши мумкин. Футболчи эркин агент сифатида Италия клуби сафига қўшилади.
Маълумот учун, Лука 13 йил давомида Мадриднинг “Реал” клуби шарафини ҳимоя қилган. Футболчининг “қаймоқранглилар” билан шартномаси 2025 йилнинг 14 июль куни якунига етди. У мадридликлар сафида 597 та учрашувда майдонга тушиб, 43 та гол ва 93 та ассист муаллифига айланган.
Изоҳ (0)