“Реал”нинг юбилей соврини, Крооснинг рекорди, Гвардиолага етиб олган Анчелотти ва мадридликлар қўлга киритган бошқа рекордлар

Мадриднинг “Реал” жамоаси клублар ўртасидаги Жаҳон чемпионати финалида “Ал-Ҳилол”ни мағлуб этиб (5:3), совринга эга чиқди.

Бу “қаймоқранглилар” учун ушбу мусобақадаги 5-соврин бўлди. Бундан олдин испан жамоаси 2014, 2016, 2017 ва 2018 йилларда клублар ўртасида жаҳон чемпионига айланганди. Бу мусобақада рекорд натижа ҳисобланади. “Барселона” ҳисобида учта соврин бўлса, “Бавария” ва “Korintians” икки мартадан ғолибликни қўлга киритган.

Шу тариқа клублар ўртасидаги ЖЧда қаторасига 10 марта Европа клуби совринга эга чиқмоқда. УЕФА вакиллари жами 15 марта мусобақа ғолибига айланган. Яна тўртта соврин Жанубий Америка минтақаси вакилларига насиб этган, бошқа минтақа вакиллари ғолиб бўлолмаган.

Умумий миқдорда “Реал” ўз тарихидаги 100-совринни қўлга киритди. “Барселона” ҳисобида 98 та соврин бор. Бироқ айрим манбалар “Реал” 99-совринини қўлга киритганини айтмоқда.

“Реал” устози Карло Анчелотти мураббийлик фаолиятидаги 25-совринга эга чиқди. Бу совринларнинг 9 тасини италиялик мутахассис Мадрид жамоаси бошқарувида қўлга киритган. Яна 8 та титул “Милан” билан қўлга киритилган бўлса, “Челси” ва “Бавария” билан учтадан, “Ювентус” ҳамда “ПСЖ” бошқарувида эса биттадан совринга эга чиққан.

Шунингдек, Анчелотти учинчи марта клублар ўртасидаги Жаҳон чемпионатида ғолиб бўлди ва бу борада Пеп Гвардиола билан тенглашиб олди.

Мадридликлар ярим ҳимоячиси Тони Кроос клублар ўртасидаги Жаҳон чемпионати совринини ютиш бўйича мутлақ рекордчи бўлиб турибди. Германиялик футболчи жами олти бор —  2018, 2017, 2016, 2014 ва 2022 йиллар “Реал” билан, 2013 йилда эса “Бавария” сафида ушбу совринга эга чиққан.

“Реал” ҳужумчиси Карим Бензема клуб сафидаги совринлари сонини 24 тага етказиб олди. Фақат Марсело (25) “Реал”да титуллар бўйича ундан олдинда. Шунингдек, Бензема умумий миқдорда 32 та титул билан Франция футболи тарихидаги энг совриндор ўйинчига айланди.

“Реал”нинг энг совриндор футболчилари:

• • Марсело (25)
  • Карим Бензема (24)
  • Пако Хенто (23)
  • Серхио Рамос (22)
  • Мануэл Санчис (22)
  • Лука Модрич (22)
  • Начо (22)
  • Дани Карвахаль (21)

“Қироллик клуби” президенти Флорентино Перес “Реал” бошқарувидаги 31-совринига эга чиқди. Бу борада Сантяго Бернабеунинг рекордига қадар битта соврин қолди.