Малика Диананинг Belville Sassoon брендига тегишли машҳур либоси Julienʼs томонидан ташкил этилган кийим ва аксессуарлар хайрия аукционига қўйилди. Малика Диана музейи асосчиси ва куратори Рене Плант либосни 520 минг долларга сотиб олди, бу унинг бошланғич 300 минг долларлик баҳосидан анча ошиб кетди.
“Малика Диана услуби ва шоҳона тўплам” деб номланган аукцион Лос Анжелесдаги Peninsula Beverly Hills меҳмонхонасида бўлиб ўтди. У ерда 300 дан ортиқ лотлар, жумладан, биринчи марта сотувга чиқарилган образлар намойиш этилди.
Бугунги кунда қироллик аъзолари орасида бир хил либосда такрорий чиқишлар одатий ҳолдир, аммо Диана ўз вақтида Белвилле Сассоонънинг ушбу либосини турли тадбирларга кийиб, протоколни бузган. Унинг келинлари Кейт Миддлтон ва Меган Маркл ҳам кейинчалик барқарор мода йўлидан боришди.
1988 йилдан 1992 йилгача Диана касалхоналарга тез-тез ташриф буюрганида крепдешин матосидан тикилган бу кўк кўйлакни кийган, шунинг учун у “ғамхўрлик кўйлаги” деб ном олган. Кенг енгли кўйлак ўша даврнинг ёрқин мода йўналишларини мукаммал акс эттиради.
“У ёрқин, қулай, ва ёқимли эди”, деди Жулиэнъс асосчиларидан бири ва ижрочи директори Мартин Нолан People нашрига берган интервьюсида. — Диана шифохоналарга болалар ва катталар олдига келганида, кўйлакдаги ранглар барчани ўзига тортганидан уни ҳамма қучгиси келарди.
Диана “ғамхўрлик либоси”ни турли мамлакатлар, жумладан, Австралия, Бразилия, Нигерия, Испания ва, албатта, Буюк Британияда кийган.
Изоҳ (0)