Фожиа жойида: малика Диананинг ўлимидан аввал айтган охирги сўзлари қандай бўлган?

Ичида малика Диана бўлган машина 1997 йили 31 август куни кечқурун Париждаги туннелда ҳалокатга учраган эди. Ушбу ҳодисадан кейин бир муддат яшаган малика эрталабга яқин шифохонада ҳаётдан кўз юмган.

Маълум қилинишича, ҳалокатга учраган машина ичидан чиқариб олинганидан кейин Диана ўзининг сўнгги сўзларини айтган. Ёрдам кўрсатган гуруҳ бошлиғи, ёнғин ўчирувчи Ксавье Гурмелон эса у билан гаплашган охирги одам бўлган.

The Independent нашрига берган интервьюсида у Диана охирги марта нима дегани ҳақида маълумот берган. Қайд қилинишича, машина бўлаклари остидан олиб чиқишганидан кейин малика: «Эй Худо, нима бўлди?», — деган.

Гурмелоннинг қўшимча қилишича, тез ёрдам машинаси етиб келгунига қадар малика нафас олишдан тўхтаган. Ксавье эса биринчи ёрдам кўрсатиб, уни ҳушига келтирган. «Албатта, анча енгил тортганман, чунки воқеа жойига етиб келган биринчи одам сифатида ҳаётни сақлаб қолишни истайсиз ва мен айнан шуни уддасидан чиқдим деб ўйлаганман», — дея ёдга олади Ксавье.

Эртаси куни маликанинг жароҳатлар туфайли вафот этганидан хабар топган ўт ўчирувчи жуда ҳам қаттиқ хафа бўлган. «Ўша тун ҳақидаги хотиралар доимо мен билан қолади», — деган у.

Қўшимча қилинишича, ўлимидан атиги бир неча соат аввал Диана ўғиллари билан телефонда гаплашган. Бу вақтда шаҳзодалар Уильям ва Гарри Шотландиядаги Balmoral қасрида бўлган. «Диана — бизнинг онамиз: Унинг ҳаёти ва мероси» номли ҳужжатли фильмда ака-укалар ушбу суҳбат билан боғлиқ тафсилотларни ошкор қилган.

Гарри суҳбат ҳақида гап кетганда, унинг шунчалик қисқа бўлганидан бутун ҳаётига татийдиган афсус-надоматни эслашини таъкидлаган. «Агар бу онам билан сўнгги мулоқот эканлигини билганимда керак бўлган ҳамма нарсани айтган бўлардим», — деган у.

Шаҳзода Уильямнинг айтишича, Диана қўнғироқ қилганида улар Гарри билан югураётган, ўз ишлари билан машғул, жиянлари билан вақтларини чоғ ўтказаётган бўлган. У ўйинга қайтиш учун суҳбатни тезроқ якунлашга ошиққанини айтиб ўтган. «Кейинроқ кўришамиз, кетсам бўладими?», — деган у сўнгги бор онасига.