Томошабинлар илк бор Топкапи саройининг ҳашаматли хоналарини, Хуррамнинг нафис либосларини ва сериалдаги бошқа қимматбаҳо буюмларни кўрганида, “Муҳташам юз йил” ортида қандай улкан ишлар турганини тасаввур қилиши қийин эди. Сериал оддий тарихий драма эмас, балки ҳар бир детали аниқлик билан ишланган, улкан кино ишлаб чиқариш машинаси эди. Бунга ишониш учун қуйидаги рақамларга назар ташлашнинг ўзи кифоя.
Сериал суратга олинмасидан аввал икки йил давомида тайёргарлик ишлари олиб борилган. Сценарийчилар, тарихчилар, рассомлар ва либос дизайнерлари Сулаймон қонуний даврини имкон қадар очиб бериш учун бир ёқадан бош чиқариб меҳнат қилган.
Дастлабки бюджет 2 миллион доллар бўлган. Туркия сериал саноати учун бу жуда катта маблағ эди. Ушбу маблағ ҳисобига нолдан қурилган, ҳар бир бурчаги қўлда безатилган улкан павильонлар барпо этилган.
Суратга олиш ишлари 4 000 квадрат метр ёпиқ майдонда олиб борилган. Бу оддий декорациялар эмас, балки XVI аср муҳитини қайта яратган махсус жойлар эди.
Сериал учун 23 та асосий саҳна декорацияси тайёрланган, суратга олишда эса 5 та ҳақиқий Усмонли даври саройидан фойдаланилган. Сериалдаги дабдабали биноларнинг баъзилари кино эффекти эмас, тарихий ҳақиқат эди.
Сериалнинг ҳар бир қисми устида ўртача 130 киши ишлаган. Улар орасида 25 нафар костюмчи ва 12 нафар декоратор бўлган. Уларнинг маҳорати туфайли сериалда матолар, ёруғлик ва турли безаклар уйғунлигидан гўзал манзара яратилган.
Фақатгина кийимлар учун 50 000 метр мато сарфланган. Декорациялар учун яна 100 000 метр мато ишлатилган. Барча либослар ҳар бир образ учун алоҳида дизайнда тикилган.
Сериал давомида жами 5 000 та костюм ва 4 000 та бош кийим ҳамда аксессуар — тюрбан, диадема, дўппи кабилар тайёрланган. Сарой аҳли вакиллари учун 200 та эксклюзив либос тикилган бўлиб, уларнинг ҳар бири 3 000 долларгача баҳоланган.
Ҳар бир эпизодда ўртача 300 та эпизодик актёрлар иштирок этган. Уларнинг сони 4 йил давомида 50 000 дан ортган.
Аммо лойиҳа камчиликсиз бўлмади. Туркия телевидениеси Олий кенгашига “Муҳташам юз йил” устидан 70 000 дан ортиқ шикоят келиб тушган. Ҳатто бош вазир Ражаб Тоййиб Эрдоғон сериални танқид қилиб, унда Сулаймон образининг тарихий ҳақиқатга тўғри келмаслигини билдирган.
-foHpAo_E.avif)
Сериал ижодкорлари эса бунга жавобан шундай деган:
“Биз тарихдан илҳомландик, аммо дарслик эмас, балки драма яратдик”.
Шунга қарамай, айнан “Муҳташам юз йил” миллионлаб томошабинларнинг Усмонли империяси тарихини ўрганиб чиқишга сабаб бўлди.
Изоҳ (0)