Ўзбекистонда болаларнинг мазмунли дам олишини ташкил этиш мақсадида Халқ таълими вазирлиги ҳузурида «Ёз-2022» штаби ташкил этилди, деб хабар беради вазирлик матбуот котиби.
Маълум қилинишича, 2022 йилги ёз мавсумида жами 1 131 та оромгоҳ (205 та стационар ва 926 та соғломлаштириш майдончалари) фаолият кўрсатиб, уларда 297 441 нафардан зиёд болалар дам олдирилиши режалаштирилган. Мавсум давомида болаларни оромгоҳларда дам олдириш ва соғломлаштириш тадбирлари учун жами 100 миллиард сўмдан зиёд маблағ йўналтирилади.
8 июнь ҳолатига 533 та таълим муассасасида соғломлаштириш майдончалари ташкил этилган бўлиб, уларда 47 840 нафар болалар дам олдирилмоқда. Соғломлаштириш майдончаларда ўқувчиларнинг ёзги таътилини мароқли ташкил этиш учун:
- 5 278 нафар меҳнат таътилида бўлмаган педагог ва ходимлар жалб қилинган. Уларда турли ривожлантирувчи компьютер ўйинлари, тасвирий санъат, ментал арифметика каби тўгараклар фаолияти йўлга қўйилган;
- кинозаллар ташкил этилиб, болаларга мўлжалланган энг қизиқарли кино ва мультфильмлар намойиш этилмоқда;
- 5 та муҳим ташаббус доирасида кўрик-танлов, фестиваль ва тадбирлар ўтказилмоқда;
- болалар учун сунъий сузиш ҳавзалари ҳам ташкил этилган.
Аввалроқ Наманганда халқаро болалар куни арафасида 200 нафар шуғулланувчига мўлжалланган дзюдо мажмуаси фойдаланишга топширилгани тўғрисида хабар берилганди.
Изоҳ (0)