2018 йилнинг 8, 9 ва 10 январь кунлари пойтахтнинг «Истиқлол» санъат саройида катта Янги йил томошаси — Андерсеннинг энг машҳур эртаги асосида саҳналаштирилган «Қор маликаси» оилавий мюзикли намойиш этилади. Мюзикл аввал рус тилида тақдим қилинган, эндиликда эса у ўзбек тилида намойиш этилади. Томошалар соат 11:00, 13:30, 16:00 ларда бўлиб ўтади.
Эртак сюжети ўзгармас, у муҳаббат, дўстлик ва эзгулик кучи ҳақида ҳикоя қилади. Анъанага кўра мазкур мюзиклдаги мусиқалар муаллифлик асарлари, уларни бастакор Альберт Холмурзаев яратган, матн муаллифлари эса Ҳасан ва Ҳусан Солиҳовлардир.
Мюзиклда иштирок этаётган актёрлар жамоаси алоҳида эътиборга сазовор. Эртакчи ролида Ўзбекистон халқ артисти, опера қўшиқчиси Рамиз Усмоновни кўриш мумкин. Қор Маликаси ролини ўзбек кино оламининг таниқли актрисаси Зарина Низомуддинова ижро этади. Қирол образини машҳур театр ва кино актёри Муҳаммадисо Абдулхайиров гавдалантирган. Герда ролида таниқли актриса Ситора Алимжоновани, Кай ролида ёш актёр Камрон Саидмуродовни кўрамиз. Қарға ролида машҳур қўшиқчи Жасур Мирсогатов, шаҳзода Клаус ролида ёш актёр Лазизхон Бургутхонов намоён бўлади.
Мюзиклни саҳналаштириш жараёнида жонбозлик қилаётган жамоа — ўз ишининг усталари. Улар иштирокидаги ҳар бир лойиҳа муваффақият қозониши муқаррар. Маълумки, хореография бундай саҳна асарларининг ажралмас бўлагидир. Бу иш хореограф Наталья Захалскаяга ишониб топширилди. Актёрларнинг ўз қаҳрамонларига айланишлари учун хизмат қилувчи либосларни эса либослар бўйича рассом Шаҳноза Муротова яратмоқда.
Мюзикл ижодкорларининг айтишларича, асарда классика ва замонавийлик уйғунлашган. Ёрқин либослар, чиройли манзаралар, сифатли мусиқа жаранги — буларнинг бари нафақат болалар, балки уларнинг ота-оналарини ҳам эртакона дунё, сеҳрли муҳит оғушига олади.
Қишки таътил кунлари ота-оналар учун ўз фарзандлари билан вақтларини ўтказиш учун чиройли имконият фурсатларидир. «Қор маликаси» оилавий мюзикли томошаси бу нафақат ҳордиқ чиқариш, балки биргаликда фойдали ва самарали ўтказилган онлардир. Ахир Андерсеннинг мумтоз асари фақат сабоқ бериб қолмай, тарбиялайди ҳам. Унда энг яхши инсоний фазилатлар: садоқат, вафо, дўстлик, эзгулик хислатлари намоён! Мюзикл ижодкорлари Ҳасан ва Ҳусан Солиҳовларнинг фикрича, актёрлар таркиби янгиланган бўлишига қарамай, мюзиклда қаҳрамонларнинг самимияти, софдиллиги ва албатта асарнинг сеҳр ҳиси сақланиб қолган.
Томошабин учун янада қулай бўлиши учун «Қор маликаси» мюзикли 2018 йилнинг 8—10 январь кунлари соат 11:00, 13:30, 16:00 да — кунига уч марта тақдим қилинади.
Мюзикл учун чипталарни «Истиқлол» санъат саройи кассасидан, шунингдек myticket.uz сайтида сотиб олиш мумкин.
Чипталар ҳақидаги қўшимча маълумотлар: 233-87-87, 169-87-87, 899-87-87. Чипталар нархлари томоша залидаги ўринларнинг жойлашувига қараб 10 000 дан 60 000 сўмгача.
Изоҳ (0)