2022 йил 20 май куни бразилиялик актриса — «Канизак Изаура» сериали юлдузи 65 ёшга тўлди. Машҳур лойиҳадан кейин унинг ҳаёти қай даражада ўзгарди, ҳозирда у нималар билан банд ва нима билан шуғулланаётгани ҳақида «Lisa.ru» нашри маълум қилди.
Бразилиялик актриса Луселия Сантуш «Канизак Изаура» телесериалида суратга тушганидан сўнг машҳурликка эришган. Ўтган асрнинг 70 йиллари охирида намойиш этилган картина томошабинларга шу қадар маъқул келдики, улар бирорта қисмни ўтказиб юбормаслик учун ишдан уйга шошилди. Шундан сўнг тақдири оғир кечган қиз ҳақидаги ушбу сериал яна бир неча бор эфирга узатилган.
Актрисалик орзулари
Луселия Сан-Паулу яқинида — Санта Терезиняда туғилган. Бўлажак актрисанинг ота-онаси оддий ишчилардан бўлиб, улар яна иккита болани — ўғли Маурилио ва қизи Кристинани тарбиялашди, кейинчалик улар ҳам кино соҳасида фаолият олиб борди. Луселия тўққиз ёшида, радиода кастинг ҳақидаги хабарни эшитиб, актрисалик карьерасини қуриш ҳақида орзулар қила бошлаган.
Унинг онаси бу касб оддий оиладан чиққан қиз учун эмас, деб ҳисоблаб, бунга қарши чиқди. Аммо синфдошлари билан театрга борганида унинг истаги янада кучайди. 14 ёшида қиз «Дон Кихот» асари асосидаги болалар спектаклида рол ўйнади.
Бунга параллел равишда у актёрлик курсларида таҳсил олди ва кастингларга борди. Унга Станиславский тизими бўйича рус тили ўқитувчиси дарс берган. Ўқишни тугатгандан сўнг Луселия Рио-де-Жанейрога кўчиб борди ва у ерда американча мусиқий фильмда иштирок этди.
Дунё юлдузи
Луселия 19 ёшга тўлганида «Канизак Изаура» телесериалидаги машҳур ролига тасдиқланган. Бу Совет Иттифоқида намойиш этилган биринчи хорижий сериал эди. Қизиғи шундаки, ўшандан бери канизак Изаура машҳур исмга айланди, одатда кимдир кўп ва қаттиқ меҳнат қилишига тўғри келса, шундай дейишади.
Маълум бўлишича, илк сериал намойишида одамлар уни ўз вақтида томоша қилиш учун ишдан таътил олишган ёки тушлик танаффусларини кечиктиришган. Картина 80 га яқин давлатда намойиш этилган. Аммо Луселия эса буни эслашни истамайди ва ундан ҳам кўпроқ уни фақат Изаура билан боғлашларини ёқтирмайди.
Бундан ташқари, Сантуш суратга тушиш ишлари жуда қийин ва машаққатли кечганини маълум қилган. «Биз ташландиқ хонадонда, ҳожатхона ва душсиз суратга тушдик, кийим алмаштирдик ва кондиционерсиз автобусларда грим қилдик. Жуда қаттиқ ишладик... Мен доимо кўйлагим этагини босиб олар эдим, қаттиқ боғланган корсет эса нафас олишимни қийинлаштирарди», — деб эслайди актриса.
Аммо бундай муваффақиятдан кейин Луселиянинг ота-онаси у билан фахрлана бошлади ва унинг танлаган касбига рози бўлди. «Улар учун кутилмаган муваффақиятим ҳақиқий бахт эди. Ота-онам том маънода хурсанд бўлди! Мен ўртанча қиз эдим ва бирдан машҳур бўлиб қолдим. Ўйлайманки, мен фильмнинг трейлеридаёқ машҳурликка эришдим. Бу шунчалик тез юз бердики, кино юлдузи сифатида уйғонганимни тушунишга ҳам улгурмаганман», — деди Сантуш.
Шунингдек, у «Тропик йўл», «Тўғри чизиқ», «Умидсиз уй бекалари» (Бразилия версияси), «Кармен», «Сенёрита» каби лойиҳалари билан ҳам танилган. 2018 йилда актриса Португалияга кўчиб кетди ва у ерда суратга тушиш ишларини бошлади.
Шахсий ҳаёт
Актриса машҳурликка эришмасидан бир йил олдин, 18 ёшида дирижёр Жон Неслинг билан турмушга қурган ва уларнинг Педро исмли ўғли дунёга келган. Орадан 12 йил ўтиб, уларнинг никоҳи бузилди, аммо у иккинчи марта турмуш қуришга шошилмади. Фақат 1999 йилда 43 ёшли Сантуш исмини ҳеч қачон оммага ошкор қилмай, янги турмуш ўртоғи билан муносабатларни қонунийлаштирди.
Маълум бўлгани шуки, актриса у билан театрда танишган ва у акустик муҳандислик билан шуғулланган. Бироқ бу никоҳ ҳам узоққа бормади. Шундан кейин актриса эркакларга мослашиш қийинлигини тушуниб, мустақиллик ва эркинликни яхши кўришини англаб етди, турмушга чиқмаслик ва эркаклар билан жиддий муносабатлар ўрнатмасликка қарор қилди.
«Менинг энг яхши севгилим — ишим ва менинг энг яхши дўстим — ўғлим», — дейди Луселия.
Айтганча, 2000 йилда у ўғли билан биргаликда «Шарқий Тимор: ҳеч ким кўрмаган зўравонлик» фильмини суратга олди. Сантуш меросхўри билан жуда фахрланади ва унинг севимли набираси учун миннатдор. Бугунги кунда у экранларда кўп кўриниш бермаса-да, ўз саҳифасини фаол равишда олиб боради.
Актриса макияжсиз суратда кўринишдан қўрқмайди ва кўплаб ҳамкасблари каби ёшидан уялмаслигини ҳамда пластик жарроҳлик қилдиришни хоҳламаслигини очиқ айтади.
Луселия ёга билан шуғулланади, саёҳат қилишни яхши кўради ва буддизмга сиғинади. «Ҳозирда мен ёга, эътиқодим, севимли ўғлим ва набирамдан тасалли топаман», — деб хулоса қилади Луселия Сантуш.
Изоҳ (0)