2022 йилдан бери Украина атроф-муҳитига етказилган зарарнинг умумий миқдори 65 миллиард евродан ошади. Биргина ўрмон хўжалигидаги талафот деярли 26 миллиард долларга етди. Бу ҳақда Украина атроф-муҳитни муҳофаза қилиш ва табиий ресурслар вазирининг биринчи ўринбосари Олена Крамаренкога таяниб, “Ukrinform” хабар берди.
Унинг сўзларига кўра, вазирлик ходимлари атроф-муҳитга зарар етказилиши билан боғлиқ 6500 дан ортиқ ҳолатни қайд этган. Бироқ бу “айсбергнинг учи” бўлиши мумкин. Боиси Россия назорат қилаётган ҳудудлар ва миналанган майдонларда ўрганиш ишларини олиб бориш имконсиз.
Ҳозир Украина табиатни муҳофаза қилиш ҳудудларининг 20 фоизини руслар назорат қилмоқда ёки уруш зонаси ҳисобланади. Ҳарбий ҳаракатлар сабаб 1300 дан ортиқ ҳайвонот ва ўсимлик турлари йўқолиб кетиш хавфи билан юзлашяпти, дея огоҳлантирди Крамаренко.
Вазир ўринбосари таъкидлашича, уруш оқибатида Украина ўрмонларининг деярли учдан бир қисмини йўқотган; 10,4 миллион гектар ўрмон майдонининг қарийб 3 миллион гектари зарар кўрган.
Бундан ташқари, Крамаренко ҳарбий ҳаракатлар сабаб атиги бир йилда атмосферага 150 миллион тонна карбон диоксид иссиқхона газлари чиқарилишини айтди.
Тадқиқот атроф-муҳитга етказилган зарар, жумладан, уруш оқибатида зарар кўрган миллий қўриқхоналардаги вазият, Каховка ГЭС тўғонининг портлаши оқибатлари, Украинадаги конларнинг ифлосланиш кўлами бўйича маълумотларни ўз ичига олади.
Изоҳ (0)