Тошкент шаҳридаги “Юнусобод” бозори тўлиқ қайта қурилади, у деярли 5 баробар кенгаяди ва бир нечта ҳудудлардан иборат замонавий савдо, бизнес ва дам олиш марказига айланади. Уларнинг биринчиси — экобозор ҳудуди 2025 йил охиригача ишга туширилади. Бу ҳақда Тошкент шаҳри ҳокимлигининг муниципал активларни бошқариш маркази ДУК таъкидлаб ўтди.
Қурилиш даврида бозор ўз фаолиятини тўхтатмайди, барча тадбиркорлар ишини давом эттиради. Янги бозор метро бекатлари, ер усти жамоат транспорти билан уйғунлаштирилади ва Юнусобод туманидаги 360 мингдан ортиқ аҳоли учун муҳим савдо ва жозиба марказига айланади.
Лойиҳа турк-сингапур лойиҳачилар жамоаси томонидан ишлаб чиқилган.
Улар ҳисобида бутун дунё бўйлаб қурилган 125 дан ортиқ муваффақиятли савдо-кўнгилочар марказлар лойиҳалари мавжуд. Янги бозор уч қаватли экобозорга айланади. Унинг ёнида ҳунармандлар ва заргарлар учун савдо майдонлари ва кўнгилочар марказга эга замонавий мегамолл пайдо бўлади. Умумий майдон 19 минг квадрат метрдан 94 минг квадрат метргача кенгаяди. Ҳозирги ноқулай, замон талабларига жавоб бермайдиган 150 та машина сиғадиган тураргоҳ ўрнига 1,1 минг машинага мўлжалланган қулай ва хавфсиз автотураргоҳ (шундан 650 таси ер остида) барпо этилмоқда.
Алоҳида таъкидлаш жоизки, лойиҳада бозорнинг ҳозирги вазифасини сақлаб қолишга алоҳида эътибор қаратилган. Лойиҳага кўра, у ўртасида атриум ва галереялари бўлган кенг, баланд зал ичида жойлашади. Бозор томдаги деразалар орқали табиий ёруғлик олади. Ўз навбатида, савдо қуйидаги ҳудудларга бўлинади: сут маҳсулотлари, сабзавотлар, мевалар, гўшт ва балиқ бўлими ҳамда бошқалар. Бозорда юқори санитария талабларига жавоб берадиган омборхоналар, музлаткичлар, гўшт тайёрлаш цехлари ва бошқа хоналар ташкил этилади.
Ташриф буюрувчилар учун кафе ва ёзги террасалар қурилади. Ушбу лойиҳа ҳудуднинг иқлим хусусиятларига мослаштирилган. Бозорга ташриф буюрувчилар ўртасида сўровнома ўтказилган бўлиб, унда шаҳарликлар қишда иситиладиган ва ёзда совитиладиган, барча мавсумда қулай бўлган майдонни ҳисобга олишни сўрашган.
Бозорни қайта қуриш жараёнида 350 га яқин тадбиркор меҳнат қилаётган бозор фаолиятини сақлаб қолиш устувор вазифа ҳисобланади. Барча савдо расталари қурилиш ишлари давомида бозор ҳудудидаги белгиланган жойга кўчирилади, бу эса узлуксиз савдо қилиш имконини беради. Қурилиш якунига кўра, савдо ўринларининг умумий сони 2000 тага етказилади ва тадбиркорлар ўзаро манфаатли, шартномавий асосда худди шундай ёки каттароқ майдонларни ижарага олиш имкониятига эга бўладилар. Тошкент шаҳар ҳокимлиги тез кунда тадбиркорлар билан махсус учрашув ўтказишни режалаштирмоқда. Унда уларга янги шарт-шароитлар тушунтирилади ва уларнинг истаклари тингланади.
Ушбу лойиҳа қўшимча 4-5 мингта иш ўрни яратиш имконини беради. Бунинг натижасида “Юнусобод” бозори фаолиятидан бюджетга тушумлар сезиларли даражада ошади.
Изоҳ (0)