Тошкент шаҳрининг Шайхонтоҳур туманидаги 4-сонли ИИБ бошлиғи ўринбосари фоҳишахона ташкил қилган аёлга ҳимоячи бўлишга, уни туман ҳудудида фоҳишахона ташкил қилгани учун жавобгар қилмасликка ваъда берди. Эвазига эса ҳар ой 1500 доллардан улуш олиб туришини маълум қилди. ИИБ мансабдорининг бу қилмиши судда кўриб чиқилди.
Жиноят ишлари бўйича Олмазор туман суди судьяси А.Саидов ИИБ мансабдори ва қўшмачи аёл ўртасидаги муаммони кўриб чиқди.
31 ёшли ИИБ мансабдори 2023 йил сентябрь ойидан бери Шайхонтоҳур туман ИИО ФМБ 4-сонли ИИБ бошлиғи ўринбосари лавозимида ишлаб келиб, Ф.А. исмли аёлнинг туман ҳудудида келгусида фоҳишалик билан шуғулланиб келишига шароит яратиб бериш, унга нисбатан қонуний чора кўрмаслик ҳамда ушбу ноқонуний фаолиятига раҳнамолик қилиб туриши эвазига ундан ҳар ойда 1500 доллардан пул талаб қилади.
ИИБ бошлиғи ўринбосари 2024 йилнинг 14 август куни ўзига бириктирилган хизмат хонасида аёлдан пора тариқасида 1500 доллар пулни олган вақтида ашёвий далиллар билан қўлга олинган, дейилади суд ҳужжатларида.
Судда аниқлаштирилишича, Шайхонтоҳур тумани бўйича ИИО ФМБ 4-сонли ИИБ бошлиғи ўринбосари 2023 йил Юнусобод туманида ўтказилган тадбирда фоҳишалик билан қўлга олинган Ф.А.ни Маъмурий жавобгарлик тўғрисидаги кодекснинг 190-моддаси билан маъмурий жавобгарликка тортиш ҳақида баённома расмийлаштирган. Ўша вақтда аёл билан танишиб қолган масъул 2024 йил июль ойида Ф.А. ва унинг икки нафар фарзандини Шайхонтоҳур туманига рўйхатга қўйишга кўмаклашган. Ва бунинг эвазига уй эгасига ҳар бир киши учун ойига 200 минг сўмдан тўлаб туриши кераклигини айтган. Суҳбат давомида аёл Шайхонтоҳур тумани ҳудудида фоҳишалик билан шуғулланса, уни жавобгар қилмаслигини, паноҳига олишини сўрайди. Аёл бу иш орқали кунига 500 доллар пул топишини айтгач, ИИБ бошлиғи ўринбосари ҳар ой унга бу хизмати учун аввалига 2000 доллардан бериши кераклигини, сўнгра келишув асосида 1500 доллардан бериб турса, ҳимоясига олишини билдиради. Бироқ тезкор тадбир пайтида биринчи улушини олишга уринган мансабдор қўлга олинади.
Суд ИИБ мансабдорининг қилмишини кўриб чиқиб, уни айбдор деб топди ва уни икки йил ҳуқуқни муҳофаза қилувчи органлар тизимида ишлаш ҳуқуқидан маҳрум қилиб, шунча муддатга озодликдан маҳрум қилди.
Изоҳ (0)