Қарши шаҳрида эркак ва унинг 3 нафар фарзанди ўз уйида иситиш тизимидан чиққан ис газидан заҳарланиш оқибатида вафот этди.
Бош прокуратура матбуот хизмати раҳбари Ҳаёт Шамсутдиновнинг “Дарё”га маълум қилишича, воқеа 17 декабрь куни содир бўлган. Ота 46 ёшда, ўғли 18, икки қизи 16 ва 10 ёшда бўлган.
Кўздан кечириш давомида аниқланган дастлабки ҳолатга кўра, уйнинг ертўласида ўрнатилган замонавий иситиш қозонининг (“двух контурний котёл”) ёнган ис гази чиқиши учун ўрнатилган мўрининг умумий ҳаво тортиш мўрисига (“витяжная вентиляция”) уланган қисмидан ис газининг сизиб чиқаётгани аниқланган.
Ҳодиса юзасидан Қарши шаҳар прокуратураси томонидан терговга қадар текширув ҳаракатлари олиб борилмоқда.
Ис газидан вафот этаётган фуқаролар
2024 йил март ойида Фарғона вилояти Бешариқ туманида бир оиланинг уч аъзоси ис газидан заҳарланиб вафот этганди. Тошкент вилоятининг Янгийўл туманида эр-хотин ис газидан ҳалок бўлди. Октябрь ойида Қорақалпоғистоннинг Нукус шаҳрида уч киши ис газидан заҳарланиб вафот этди. Ноябрь ойи бошида Андижон вилоятининг Жалақудуқ туманида 4 киши ис газидан заҳарланиб вафот этди. 12 ноябрда Бухоро вилояти Когон шаҳрида аёл ва унинг вояга етмаган фарзанди ис газидан вафот этди. 18 ноябрь куни Наманган вилоятининг Поп туманида бир оиланинг 3 нафар аъзоси ис гази қурбони бўлди. 7 декабрь куни Андижонда уч нафар фарзанди бўлган эр-хотин кўмирдан чиққан ис газидан вафот этди. Тошкент вилоятининг Пискент туманида 14 декабрда тўйи бўлган келин-куёв 15 декабрь куни ис газидан вафот этди.
Изоҳ (0)