Японияда аниме студияга ўт қўйиб, 36 кишининг ҳаётига зомин бўлган шахс ўлимга ҳукм қилинди

Киото суди 45 ёшли Шинжи Аобени 2019 йилда Kyoto Animation студияси биносига ўт қўйганликда айбдор деб топди. Ёнғин оқибатида 36 киши ҳалок бўлганди. Аоба ўлим жазосига ҳукм қилинди.

ABC News хабарига кўра, судья ҳукм учун Аобанинг ақли етарлича расо эканини таъкидлаган. У ўт қўйишни атайлаб режалаштирган ва нима қилаётганини тушунган ҳолда жиноят содир этган. Айбланувчи 25 январь куни бўлиб ўтган икки суд мажлисидан сўнг ўлимга ҳукм қилинди.

“Студияни бир зумда дўзахга айлантирган ва 36 кишининг қимматли ҳаётига зомин бўлган ҳужум чексиз азоб-уқубатларга сабаб бўлди”, — деди судья Кейсуке Масуда.

Шинжи Аоба 2019 йил 18 июль куни Kyoto Animation аниме студиясига кирган. У ҳамма нарсага бензин сепиб, ўт қўйган ва студия ишчилари ўлиши керак деб бақирган. Руҳий касал эркак Kyoto Animation ходимлари гўёки унинг ғоясини ўғирлашганига ишонган. Ёнғин оқибатида 36 киши куйиш ёки ис газидан заҳарланиш оқибатида ҳалок бўлди, студиянинг 70 нафар ходимидан 32 нафари оғир тан жароҳати олди. Уларнинг кўпчилиги ногирон бўлиб қолди.

Судья Кейсуке Масуданинг сўзларига кўра, Аоба ёзувчи бўлишни хоҳлаган ва молиявий муаммоларга дуч келган. Kyoto Animation ижодий танловини ўтказганида, у ўз асарларидан бирини студияга юборган. Кейинчалик, эркак студия унинг нашр этилмаган китобидаги ғоялардан аниме сериясини яратишда фойдаланганини айтиб, қасос олишга қарор қилган. Анимация студиясига ўт қўйишдан бир ой олдин Аоба Токио яқинидаги темирйўл вокзалида ҳам теракт уюштиришни режалаштирган, бироқ буни амалга оширмаган.

Аобанинг ўзи ҳам қаттиқ куйган — у 12 марта операция қилинган ва ўн ой касалхонада ётган. Эркак узоқ вақт давомида овқатланиш ва мустақил туриш қобилиятини йўқотган. Аоба соғлиғи нисбатан тикланганидан кейингина ҳибсга олинди ва судга тортилди. У судда ногиронлар аравачасида ўтирган ҳолда иштирок этди.

Прокуратура айбланувчини осиб ўлдиришни талаб қилди. Аобанинг адвокатлари ўз мижозининг руҳий ҳолатини кўрсатиб, жиноят вақтида унинг ақли расо бўлмаганини таъкидлади ва енгилроқ жазо тайинлашни сўради.

Аввалроқ суд жараёнида Шинжи Аоба тўрт йил ичида илк бор қурбонларнинг яқинларидан кечирим сўраган.